第1屆日本民進黨黨魁選舉

第1屆日本民進黨黨魁選舉
日本選舉政治專題
‹ 2015 •  • 2017 ›
2016年9月15號
選舉類型				黨魁
選舉統計
總投票數						849
			蓮舫－民進黨
			投票數				503
			前原誠司－民進黨
			投票數				230
			玉木雄一郎－民進黨
			投票數				116
民進黨黨魁
選前 岡田克也 民進黨						選後 蓮舫 民進黨

第1屆日本民進黨黨魁選舉響2016年9月15號舉行。

結果由日本華裔參議員蓮舫贏出最大在野黨民進黨第一位女黨魁，佢就再次為國籍風波同公眾道歉。

議題

蓮舫國藉問題

有望成為日本最大在野黨民進黨黨魁嘅華裔參議員蓮舫，承認自己重有中華民國國籍，佢就近日引起嘅混亂道歉，但強調唔影響佢角逐黨魁。老豆係台灣人、老母係日本人嘅蓮舫，同台灣當局確認過，得知重保留住中華民國國籍，同佢之前嘅講法有出入，佢就同公眾道歉。蓮舫話：「十七歲嗰時攞到日本籍，同老豆一齊去搞註銷台灣籍嘅手續，我有咁嘅記憶，我對記憶唔啱引嚟嘅混亂，實在係非常抱歉。」。

7月嘅參議院選舉，響東京選區高票連任，更被傳媒話有資格問鼎首相一職，四十八歲、響東京出生嘅蓮舫，曾經話過已經脫離中華民國國籍，一出生就係日本人，之後就改口話響法律上1985年之後就係日本人。到而家搞清楚國籍問題之後，蓮舫話已經同台灣方面搞放棄國籍手續。佢強調，佢嘅情況並冇違法，亦唔影響佢競逐民進黨黨魁。為日本同民進黨工作嘅心係唔會改變。

民意調查

《朝日新聞》調查之後話，響民進黨支持者入面，蓮舫嘅支持率高達六成，主要對手、前外相前原誠司嘅支持率就有兩成六。蓮舫大幅領先，日本傳媒相信佢會響首輪投票到贏出。

結果

日本民進黨響東京召開臨時黨大會選出新黨魁，三個候選人上台作最後拉票，蓮舫再次講到國籍風波：「我嘅老豆響台灣土生土長，老母係日本人。由於我記憶模糊搞到混亂，非常抱歉。」佢所講嘅記憶模糊係指十七歲嗰時攞到日本國籍，但唔知重留住中華民國國籍。

黨魁投票以國會議員佔嘅比重最多，每人有兩票。之後地方議員同黨員等所佔嘅票數就少啲，全數一共有八百四十九票。響首輪投票攞到過半數嘅候選人就贏出，結果蓮舫以五百零三票贏出，打低主要對手前外相前原誠司，做咗第一位女黨魁。佢向黨員鞠躬致意，蓮舫強調面對強勢嘅安倍政府同執政自民黨，大家必須團結一致，等選民知道民進黨係做實事嘅在野黨：「我們面對強勢嘅執政黨，現今政權支持度好高，唔應該只顧批評，而要交出方案。大家要為國家未來戰鬥，等民眾揀我哋呢個黨。

四十八歲嘅蓮舫接替岡田克也出任黨魁，任期到2019年9月。佢響贏出之後接受台灣傳媒訪問，話希望得到台灣民眾全力支持。