簷

簷，音sim⁴或者jim⁴，係屋頂伸延出牆外面嘅部分，可以企響下面避雨避曬。

呢個字其實係「檐」字嘅俗字，不過可以有嘅讀音就有啲唔同。用呢個字嘅詞語包括：屋簷、簷篷、簷蛇（讀 jim⁴se⁴或者第二字變陰上調變成 jim⁴se^２）。

鹽蛇?

顧名思義，簷蛇就係一種鍾意響屋簷出沒嘅長形動物。坊間好多人唔知呢個字可以讀做 jim⁴，所以唔知「簷蛇」點樣寫。於是，佢哋就用假借字，寫做「鹽蛇」甚至「鹽寫」。

卒之，有啲人就誤會咗，以為「鹽蛇」呢個名，係因為簷蛇鍾意偷鹽食而來。