紅A

出自維基百科,自由嘅百科全書
跳去導覽 跳去搵嘢
紅A經典紅色同藍色嘅軟膠水殼
曾經喺1970年代風靡香港學生嘅紅A塑膠書喼上嘅產品說明貼紙(香港歷史博物館展品)

紅A英文Red A)係香港一個膠質產品嘅牌子,生產嘅公司星光實業有限公司喺1949年創立,早期主要銷售塑膠製造嘅家庭用品,現時生產嘅各類產品產品包括:酒店用品、餐飲廚房用品、工業用品、醫療用品、家庭用品等,係香港最大嘅塑膠製造商。「紅A」係現時少數仍然維持產品由香港製造嘅牌子,更以「上等質素,紅A做到,100%香港製造」為口號。過往「紅A」產品只有紅、藍兩種顏色,近年先至提供多種顏色畀顧客選擇。集團有三個頂級品牌:「紅A」、副線「Cre-a」、「A-Ware」。

牌子名嘅由來[編輯]

當1949年星光實業成立嘅時候,創立一個名為「ACE」嘅牌子。到咗1950年代當時開始商標註冊制度,由於已經有一個啤牌嘅牌子已經用咗「ACE」,星光實業唯有更改牌子嘅名,只係用單一個「A」字,刪除咗「C」同「E」兩個字母,先至能夠成功註冊。之後消費者喺購買產品嗰陣見到紅底白色「A」字嘅標誌,就順口叫做「紅A」。根據星光實業嘅董事兼總經理梁鶴年講,「紅A」可能係全世界唯一採用單一個英文字母註冊嘅商標。

歷史[編輯]

戰後香港人口急劇增加,塑膠製品剛開始喺美國日本流行,塑膠家品嘅成本同售價都比製材料平,喺香港嘅需求日漸增加,星光實業因而由日本引進機器製造塑膠製品。1960年代香港多次實施食水管制(制水),家家戶戶以至工廠食肆需要容器儲存食水,「紅A」膠水桶因為比鐵罐同木桶輕而大行其道,令「紅A」成為家傳戶曉嘅品牌,而紡織同塑膠業令到香港就業人口同工業區增加[1]

近年「紅A」唔再以只係售賣家庭用品為重點,而逐漸將市場開拓至大型客戶,例如政府機構、酒樓食肆、酒店、銀行等。

出面網頁[編輯]

參考[編輯]