細路祥 (1999年電影)
《細路祥》（英文：Little Cheung）係1999年上畫嘅港產片，由陳果編劇同執導，姚月明、麥惠芬、麥雪雯主演。
劇情簡介
[編輯]八歲嘅祥仔由「賓妹」（菲傭）湊大，唯一陪佢嘅係鍾意喺電視睇粵劇名生「新馬師曾-祥哥」曾永祥唱戲嘅阿嫲。祥仔經常幫屋企嘅茶樓送外賣，因為精靈可愛，所以龍蛇雜處嘅街坊大家都鍾意呢個「細路祥」。有一日祥仔遇到嚟佢屋企茶樓應徵不過俾人拒絕同佢一樣大嘅女仔阿芬，於是好心提議同佢一齊分享送外賣貼士嘅「生意」，從此兩個人每日無憂無慮噉喺人群中展開佢哋好似「情定日落橋」噉嘅城市冒險記，兩個人嘅感情亦慢慢滋長起嚟。但當祥仔因為追查當年混入幫派而俾阿爸趕出家門嘅阿哥下落嘅時候，俾阿爸痛打到離開屋企，小人蛇阿芬亦面臨被迫遣返返大陸嘅命運…。