羅策群（1893年—1937年），廣東興寧人，抗日殉國將領。
羅策群係保定軍校六期工科畢業，畢業後返廣東當兵，係陳濟棠手下營長同團長。抗戰開始時，佢已經係第六十六軍一五九師四七五旅旅長。抗戰開始後，余漢謀從廣東調第六十六、八十三軍開赴上海淞滬前線，一五九師就曾經擊敗日軍久留米師團。羅因為戰功昇做少將副師長。南京保衛戰之中，第一五九師師長病咗，由羅策群代理師長。之後決定放棄南京，六十六同八十三軍一齊突圍。一五九師打前鋒，去到紫金山遇敵受阻，幾次都衝唔過去。羅策群於是高呼「丟那媽，幾大就幾大，唔好做衰仔！」，親自同手下一齊衝鋒，結果中彈殉國。而羅策群呢幾句說話，日後成為廣東軍隊嘅名言。
