美杜莎
想搵第二個意思嘅話，請睇美杜莎 (搞清楚)。
提示：呢篇文講嘅唔係杜麗莎。
美杜莎（希臘話：Μέδουσα），係希臘神話裏面一個女妖，高哥三女妖之一。佢阿爸係海神Phorcys，阿媽係海妖怪凱托。傳說佢好醜樣，有野豬嘅牙，每一條頭髮都係毒蛇。每當有人或動物見到佢嘅眼，就會即刻變成石像。
美杜莎原本係一位非常靚嘅金髮少女，亦成為雅典娜嘅女祭司，但係因為佢喺雅典娜女神嘅宮殿俾海神波塞冬強姦，雅典娜認為神殿被玷污，一嬲之下將美杜莎嘅頭髮變成毒蛇，變成醜樣嘅怪物。
美杜莎最後俾希臘英雄柏修斯斬頭，獻畀雅典娜，雅典娜將美杜莎嘅頭嵌喺神盾埃癸斯中間。任何直望美杜莎雙眼嘅人都會變成石像。後來美杜莎一詞就有極之醜樣嘅女人嘅含意。亦有傳說話柏修斯用美杜莎個頭對付海怪（鯨魚座），救咗被拎去做祭品嘅仙女座。
另外，傳說美杜莎同海神波塞冬有兩個仔女，而呢兩個仔女喺美杜莎被殺後，由佢個身度走出嚟。佢哋分別係：飛馬比加沙斯（後嚟成為天馬座）同巨人克律薩俄耳（Χρυσάωρ）。
