翠華餐廳集團

中環蘭桂坊分店

翠華集團中心（2022年已經成棟拆咗）

翠華餐廳集團（Tsui Wah Restaurant Group，港交所：01314）係香港連鎖茶餐廳集團，經營多個餐飲品牌，響中環、銅鑼灣同佐敦等地都有開分店。另外業務亦拓展到中國內地、澳門同新加坡。

大部分香港茶餐廳嘅嘢食，佢哋都有供應，亦提供魚蛋粉同各式咖喱，中秋節時更會推出月餅。嘢食價錢大都比一般茶餐廳貴。

• 
  中環德輔道中分店
• 
  尖沙咀加拿分道分店
• 
  將軍澳厚德邨分店
• 
  將軍澳新都城分店（翻新前）
• 
  東涌富東邨分店
• 
  山頂廣場分店（結業前）

史

• 1977年響九龍新蒲崗開第一間翠華餐廳。
• 1990年代響中環開分店，走高級茶餐廳路線，跟住就不斷擴張，響各區開分店。另外響銅鑼灣首創24小時營業茶餐廳。
• 2012年5月喺武漢開首間分店。
• 2012年11月喺香港交易所主板招股上市。
• 2017年12月23號，推出全新烘焙品牌「Beat」，首間「Beat by TSUI WAH」尖沙嘴港鐵站內開業。
• 2018年6月5號，推出兩個全新品牌，分別為「廿一堂」，「輕。快翠」。喺將軍澳天晉匯二期同中環大館營運。

政治立場

翠華集團嘅主席李遠康一般被視為親中派人士，佢曾經連同多名飲食界人士參選飲食界選委，主張反對取消強積金對沖、反對標準工時同支持輸入外勞，並且得到親中派立法會議員張宇人支持。另外，李遠康本身同張宇人亦有唔錯嘅關係。亦因為咁，喺香港逃犯條例爭議期間，翠華集團被視為藍店，被黃色經濟圈嘅支持者杯葛。

旗下餐飲品牌

• 翠華餐廳
• 港式餐廳
• 合發餐廳
• 廿一堂EATery 21
• 烘焙品牌「Beat by TSUI WAH」
• 錫蘭
• 山幸土產

事件

調味包設計被親中派發炮攻擊

2019年，香港陷入逃犯條例爭議，喺8月29號，親中派嘅吳秋北同馮煒光喺Facebook批評翠華餐廳最新調味包嘅包裝，當中包括印有穿著制服嘅動物嘅胡椒同白糖包裝，係諷刺警察，又話要罷食翠華餐廳。之後翠華回應，設計喺2015年嘅時候已經有，2015年同2018年介紹翠華嘅網誌都有講，而且原意係呼籲客人響應環保，不點名批評吳秋北同馮煒光係刻意抹黑，別有用心破壞集團聲譽，保留法律追究權利。

衛生情況爭議

2020年4月，網上流傳翠華分店嘅麵包櫃懷疑有老鼠出沒，大埔分店仲俾人影埋相，顯示有一隻大老鼠喺度大模斯樣地咁喺麵包櫃入面食麵包。張相喺網上瘋傳，引來唔少網民留言討論。翠華之後回應話會做深層清潔，又提醒員工要做好維護工作。

關於旗下錫蘭品牌

《壹週刊》喺2021年報導關於翠華開設新茶餐廳品牌「錫蘭」嘅事，記者去到佢哋嘅分店採訪，員工否認自己係翠華旗下，但之後《壹週刊》就發現，錫蘭茶餐廳嘅註冊地址，正正喺翠華總部。

出面網頁

• 〈翠華餐廳〉。
• 〈翠華餐廳 Tsui Wah Restaurant | Facebook〉。
• 〈【新股上市】消息指翠華餐廳擬上市集最多１６億，料估值達６２億〉。
• 〈外賣仔傳奇 翠華茶餐廳上市 老闆白手興家 生意估值50億元〉。2012-04-26。
• 〈翠華餐廳末季上市籌15億〉。2012-04-26。
• 〈香港翠華餐廳老闆外賣出身 白手起家典範〉。2012-04-27。