腓特烈·密斯特拉

出自維基百科,自由嘅百科全書
跳去導覽 跳去搵嘢
Disambig.svg
呢篇文章講嘅係法國作家。想搵其他都叫Mistral嘅野,睇吓「Mistral」。
密斯特拉

約瑟夫·伊天·腓特烈·密斯特拉(Josèp Estève Frederic Mistral,1830年9月8號1914年3月25號),係法國奧克文學作家、普羅旺斯方言辭書學家,1904年攞諾貝爾文學獎

生平[編輯]

1830年9月8號佢響法國南部嘅城鎮馬亞訥出世,出身響一個有錢嘅農民屋企,老豆嚟自普羅旺斯地區聖雷米

密斯特拉響九歲開始返學,不過因為成日曠課而畀屋企人送去寄宿學校讀書。響尼姆攞到學士學位後,佢響1848年至1851年響亞桑蒲坊艾吉斯-馬賽大學攻讀法律。期間,佢研究咗普羅旺斯嘅歷史。響老豆嘅支持同解放下,密斯特拉下定決心要守護同埋恢復奧克文,呢個咁古老嘅話。

密斯特拉致力於恢復同發揚奧克文。1854年,佢同羅曼尼等七位對普羅文化熱心研究嘅人成立咗「菲利伯立格」協會,呢個協會專門推廣、宣傳同埋研究普羅旺斯嘅方言、風俗同埋文化。同時,密斯特拉仲參加咗《普羅旺斯詩選》嘅編輯。另外,佢仲搜集、整理咗好多當地嘅民間傳說、神話故仔、風土人情、方言歷史等,用咗八年時間編好《新普羅旺斯字典》,呢部字典不單止係記錄咗普羅旺斯嘅精粹,仲係為奧克文建立里程碑。密斯特拉對於普羅旺斯文化嘅貢獻,唔單止在於佢發掘、整理咗普羅旺斯嘅傳統,更多嘅係在於佢用普羅旺斯方言所寫嘅詩歌,將呢種方言提高去到文學水平,用藝術形式將普羅旺斯文化傳播到歐州。

據說密斯特拉響學生時代用過法文寫詩,但佢阿媽睇唔明,所以佢就用奧克文寫咗《米赫爾》(Mirèio)呢篇文章。《米赫爾》響1859年出版,係密斯特拉最重要嘅作品,呢個故仔係講兩個後生仔嘅愛情故事。佢利用呢個作品,唔單止成功推廣奧克文,仲分享咗當地嘅文化。

1899年,佢設立阿拉坦博物館,一個主要係介紹普羅旺斯文化嘅博物館。依家博物館係法國嘅歷史紀念建築。

由於佢成世人致力於普羅旺斯文化嘅普及,所以佢響1904年攞到諾貝爾文學獎。個屆仲有另一位得獎者,西班牙劇作家荷西·伊克格拉,佢地平分咗獎金。

1876年,密斯特拉響第戎主教座堂同勃艮地人Marie-Louise Rivière(1857–1943)結婚,兩個人冇仔女。1914年,佢響馬亞訥過身。

作品[編輯]

參與編輯的詩選及字典:

  • 《普羅旺斯詩選》
  • 《新普羅旺斯字典》

詩作:

  • 《普羅旺斯》,處女作
  • 《黃金島》
  • 《金黃色的百合花》
  • 《米赫爾》,代表作
  • 《羅納河之歌》

作詞:

  • 《聖杯》,普羅旺斯民歌

人際[編輯]

佢係小說家阿豐斯·都德嘅老友,都德響後生個陣已經識密斯特拉,仲寫咗一篇叫《詩人密斯特拉》嘅散文,收錄響小說《磨坊信札》入面。

密斯特拉之所以有今日嘅名氣,唔可以唔提詩人阿豐斯·德·拉馬丁。響佢嘅《米赫爾》出版之後,拉馬丁專登響期刊 Cours familier de litérature 嘅第40版讚揚佢。而兩個人亦保持書信來往。

智利作家、1945年諾貝爾文學獎得主加芙列拉·米斯特拉就係密斯特拉嘅忠實fans。加芙列拉·米斯特拉原本叫盧西拉·戈多伊·阿爾卡亞加,因為仰慕密斯特拉,所以將「密斯特拉」西班牙文化成「米斯特拉」做佢嘅筆名。

[編輯]