腹有詩書：全港小學校際中國語文常識問答比賽 (2020-2021學年)

腹有詩書：全港小學校際中國語文常識問答比賽係由灼見名家傳媒主辦，語文教育及研究常務委員會贊助嘅小學校際問答比賽，目的係鼓勵香港嘅小學生增加中文閱讀，提升佢哋對學習中國語文同中華文化嘅興趣。

參賽資格

喺2020/21學年喺香港教育局註冊嘅小學讀緊四年級至六年級嘅學生。每隊由10位學生組成，每個環節每隊派出3位學生做正選出賽，其他隊員喺必答題擔任智囊團。

賽事採用淘汰制方式進行。

第一回合初賽共有54隊參加，分為18組進行18場比賽，每場三隊角逐，每場最高分嗰一隊晉級第二回合。

第二回比賽共有18隊參加，分為六組，進行六場比賽，每場三隊角逐，每場最高分嗰一隊晉級準決賽。

六隊分為三組，每組兩隊，分別進行三場準決賽，每場最高分嗰一隊晉級決賽。

三隊決賽隊伍進行比賽，決定出冠軍、亞軍同季軍。

比賽分為必答題同搶答題兩個環節，每隊有底分100分。比賽以粵語進行，學生應該用粵語作答，不過用普通話作答都可以接受。

每隊作答10條問題，10秒之內唔答當棄權，答啱加20分，答錯或棄權唔扣分，其他隊伍冇得補答。喺必答題環節，答啱全部題目額外加30分。如果唔識答每隊有兩次機會可以問智囊團，隊長決定用唔用智囊團嘅答案。

參賽隊伍需要撳搶答器，要等主持人叫咗隊名先至可以作答，5秒之內唔答當棄權。答啱加30分，答錯或棄權扣20分。若果首先搶答嗰隊答錯或棄權，其他隊伍可以補答，答啱加20分，補答答錯或棄權扣10分。