舊域多利醫院
舊域多利醫院（Old Victoria Hospital）係香港舊時一間公營醫院，喺香港島山頂白加道15至17號，喺1897年至1947年間運作。醫院關閉之後，主樓就拆咗並用嚟起咗政務司司長官邸。喺1921年起嘅產科翼樓（Maternity Block）就保留，現已被評為香港三級歷史建築。
史
[編輯]舊域多利醫院喺1897年由當時嘅香港總督羅便臣奠基，係紀念維多利亞女皇登基60週年而開設，因此又叫做域多利銀禧醫院（Victoria Jubilee Hospital）。奠基石嘅下面放咗一個時間囊，裏面有當時嘅報紙同硬幣。由於工程延誤，醫院延遲到1903年11月先至正式啟用。奠基石被移到白加道近醫院徑一帶，並由當時嘅港督卜力再進行過奠基儀式。
當時舊域多利醫院專門收容同治療女性同兒童病人，因此喺1921年加建咗產科翼樓。當時政府舉辦咗一個建築設計比賽，結果由巴馬丹拿建築事務所贏得比賽。醫院喺1947年停辦，主樓隨即拆咗改建做輔政司官邸，產科翼樓就改做政府宿舍，並改名叫維多利亞大廈（Victoria Flats），而家由政府產業署管理。奠基石就一直保留喺原來嘅位置。
建築
[編輯]三層高嘅產科大樓用新古典主義建築風格設計，亦受到意大利文藝復興建築風格同喬治亞風格所影響。正面嘅紅磚同仿石外牆為大樓帶來優雅嘅外觀，地下嘅拱形柱廊、拱心石係新古典主義建築嘅典型特徵，二、三樓嘅威尼斯式窗門、建築物正中嘅拱形石雕同突出嘅屋簷就展現出優美嘅意大利建築風格。