九龍半島

1915年嘅九龍半島(中間)

九龍半島係香港市區一個向南嘅半島，三面俾維多利亞港包圍。原本半島大部份都係山嚟，不過經過百幾年填海，家下海邊全部係平地。半島以界限街為分界，即係根據由宋皇臺到深水埗同大角嘴半島交界拉一條直綫做分界。英國未得新界之前，呢處亦叫英屬九龍，以別於大清所有嘅九龍。

史

大清因為唔夠英國打，1860年就割咗九龍半島畀英國。因為咁，原本以山為界嘅九龍，就畀九龍半島呢條直綫分開做兩部份，北面係大清嘅九龍，以九龍砦城為中心；南面成個九龍半島係英治九龍，英國就立法叫半島呢部份做九龍（Kowloon）。後尾1898年英國又趁法國租廣州灣，以安全為理由問大清租埋新界，咁九龍又可以合返埋一齊。新得嘅九龍部份，法律上就叫新九龍（New Kowloon）。不過無論九龍同新九龍，行政上都當係九龍市區，好少會分開來講。

地理

九龍半島，唔計填地，都係山來嘅。南面係尖沙嘴，個尖指向香港島。東南有紅磡灣，東面係九龍灣，西面就由尖沙嘴到旺角嘴就似一條較為直嘅海岸。未填之前，西北面大角嘴係一個同九龍半島平行嘅小半島。