萬國兒童佈道團
萬國兒童佈道團（英文：Child Evangelism Fellowship，簡稱CEF）係一個國際性、冇分宗派、以《聖經》為基礎嘅兒童福音機構。1937年喺美國成立，總部設於美國密蘇里州沃倫頓，目前喺全球超過190個國家成立地區分部，超過2,900位宣教士。
使命[編輯]
- 向兒童傳福音，引領佢哋到教會
- 以聖經為基礎，栽培信主嘅兒童
- 裝備教會信徒參與兒童福音事工
歷史[編輯]
萬國兒童佈道團創辦人歐爾文牧師（Jesse Irvin Overholtzer）喺美國一個基督教家庭成長。喺12歲嘅時候，佢認識到自己嘅罪，就請求媽媽領佢信耶穌。可惜，媽媽同佢講：「仔呀，你太年輕喇」。因此，歐爾文牧師喺佢升讀大學嘅時候先聽到福音，歸信基督。後嚟，佢重成為咗一位牧師，並讀到司布真（Charles Spurgeon）嘅講章：「如果有適當嘅指導，五歲以下嘅兒童都可以好似成年人一樣真正信主並重生。」。自此之後佢開始向兒童佈道，並喺60歲嘅時候創立萬國兒童佈道團，向全球兒童傳講福音，每日為全球兒童歸主而禱告。
香港分部[編輯]
萬國兒童佈道團香港分部，由美國嘅司徒牧師（Curtiss Stewart）同牙買加華僑羅秀蓮宣教士喺1963年開拓成立。目前，萬國兒童佈道團香港分部每年舉辦超過40場佈道會、向超過10,000位兒童佈道、領超過5,000位兒童決志信主、訓練2,000位兒童導師等。
