蔡穎怡

出自維基百科,自由嘅百科全書
跳去導覽 跳去搵嘢
蔡穎怡
個人資料
出世 (1989-06-23) 1989年6月23號(31歲)
英屬香港
職業運動員

蔡穎怡英文Katherine Choi1989年6月23號—)係香港花式滾軸溜冰運動員。而家排名香港第一,所以亦都被稱為「香港Roller女王」,係香港第一位亦都係唯一一位全職花式滾軸溜冰運動員。佢曾經攞過35次香港冠軍、全國輪滑錦標賽女子成年組單排賽冠軍同埋亞洲輪滑錦標賽女子單人綜合季軍[1]

生平[編輯]

蔡穎怡六歲嗰年,佢父母因為想佢做多啲運動,希望令到身體唔好咁虛弱,於是就送咗一對滾軸溜冰鞋畀佢,而佢爸爸就成為咗佢第一位「教練」,慢慢培養佢嘅興趣。冇耐就報讀咗正式嘅滾軸溜冰班正式跟教練學,喺7歲嘅時候佢第一次參加比賽,到咗11歲就攞到第一個分組全港冠軍,但佢形容嗰次嘅勝利只係僥倖,而教練亦都形容過佢做最差嘅學生[2]。到咗大學,佢發現師姐都係讀完大學就唔會繼續溜冰,但蔡穎怡唔想跟住呢個傳統,於是佢就成為咗香港第一位亦都係唯一一位職業花式滾軸溜冰運動員。2012年,維園個滾軸溜冰場冇咗,佢舊教練亦都冇再教佢,從此令到佢只可以自己訓練,而佢媽媽就會喺旁邊幫佢拍片。佢亦都試過要自費去參加世錦賽[1][3]。2012年佢攞咗亞錦賽女子單人綜合銅牌,2019年更加攞咗中國全國賽女子成年組單排賽冠軍[4]

2020年,因為武漢肺炎疫情,康文署成日封嗮啲滾軸溜冰場,令到蔡穎怡少咗好多機會訓練,亦都少咗好多人跟佢上堂學溜冰,所以佢就開始自己縫口罩,然之後攞去賣,幫補下家計[4]

[編輯]

  1. 1.0 1.1 "【Junior・專訪】蔡穎怡:我溜故我在". 體路Sportsroad. 2021-03-20. 喺2021-04-02搵到.
  2. "[爸媽看招] 走過高敏童年 蔡穎怡以另類教法培育接班人". 明報. 2020-04-03. 喺2021-04-02搵到.
  3. "【青黃不接】滾軸溜冰港將缺支援 「無師」蔡穎怡曾自費戰世錦賽". 蘋果日報 (香港). 2020-05-23. 原先內容歸檔喺2021-04-01. 喺2021-04-02搵到.
  4. 4.0 4.1 "【體壇停擺】Roller女王變口罩女工 為幫人蔡穎怡「馬死落地行」". 蘋果日報 (香港). 2020-05-23. 原先內容歸檔喺2021-04-01. 喺2021-04-02搵到.