蔴雀番種 (花牌類)

花牌類嘅蔴雀番種係蔴雀嘅花牌類番種。

正花

坐位數字一樣嘅花牌。每隻正花計一番。

• 坐位：東位1，南位2，西位3，北位4。
• 例子1：如果呢局係東風南，而玩家攞到1號或者2號花嘅話計兩番。
• 例子2：如果玩家坐南位而攞到2號花嘅話計一番。

一臺草

攞齊1、2、3、4唔同色嘅花牌。

一臺花

攞齊1、2、3、4一樣色嘅花牌。每組計兩番，唔計正花。

八仙過海

攞齊8隻花牌。台灣牌計八番，廣東牌計二十番，香港牌當例牌食糊。當自摸計，所以其他三家都要俾錢。除咗香港牌之外，其它玩法如果摸晒8隻花嘅話既可以選擇8隻花食糊，亦可以選擇繼續打落去直至有人食。不過如果係自己食糊先算八仙過海，否則唔可以計八仙過海。

七搶一

攞7隻花牌，之後如果其中一家攞到第8隻花嘅話可以搶花牌食糊。台灣牌同廣東牌計八番，香港牌當例牌食糊。出第8隻花嘅玩家包晒。

• 例子：如果玩家A攞咗7隻花牌，而玩家B攞第8隻花嘅話，A可以搶咗佢隻花兼且可以食糊，算B出銃。

不過香港牌亦有另外一種玩法，就係其中一家集齊7隻花之後可以唔使等第8隻花直接宣布食糊，計三番自摸。