香港蔴雀

出自維基百科,自由嘅百科全書
Jump to navigation Jump to search

香港蔴雀蔴雀嘅其中一種,遊戲方式同廣東蔴雀大致一樣,但係番種少好多,實際上係屬於比較傳統嘅「清章」(或者叫「舊章」)打法,同「新章」嘅廣東蔴雀有區別。

起源[編輯]

現代蔴雀由老章蔴雀演化而成。經過演化後,有所謂「清章」嘅打法。噉係香港同廣東蔴雀嘅基礎。

廣東蔴雀本身指嘅係十三張蔴雀入面嘅清章打法,即係最純粹嘅現代蔴雀打法,牌型亦都只有非常純粹嘅食糊方式,例如對對糊混一色等。到咗後來,啲人陸續喺清章蔴雀上加添「六獨」、「十八番」、「無奇唔有」等食糊方式,形成咗新章蔴雀。「廣東蔴雀」一詞就變作指新章打法。

相比之下,香港蔴雀仍然維持傳統嘅清章打法。香港蔴雀跟廣東蔴雀亦都成爲咗兩支,有住唔同嘅規則,例如唔同嘅食糊牌型同番數計算。不過,由於香港蔴雀加添咗三番起糊、摸到尾(即唔保留尾棟)呢啲規則,亦都增加咗新章嘅個別食糊牌型(如「十八羅漢」),所以現時香港蔴雀事實上係「新派清章」[1]

沿革[編輯]

喺過去,香港市區新界村落嘅番數計法有所差異,例如香港蔴雀而家普遍採用「三三制」,即係混一色對對糊小三元花糊等都係以三番計(食花糊連自摸計應該係四番,但食花糊者例必自摸,一般唔會加計自摸嘅一番)。而過去新界村落嘅玩家沿用傳統「二二制」往往只計花糊做兩番。而事實上,香港蔴雀傳統係採用「二二制」,到後來才逐漸演變成「三三制」。

「二二制」年代[編輯]

而喺過去嘅年代,多以「雞四」為主流,亦即係雞糊(零番)作為起糊,四番封頂。而制度上亦多以「唔打花」及「二二制」為主。「二二制」係指混一色、對對糊以兩番嚟計,而清一色就以四或五番嚟計。

「三三制」年代[編輯]

而家常用嘅「三三制」係指混一色、對對糊以三番嚟計,而清一色就以七番嚟計。

而隨住花牌嘅引入同及「三三制」嘅增值,使到舊時代嘅四番封頂制度嚴重失衡。花牌嘅引入使「一番」幾乎垂手可得,正花亦都計一番,無花亦都計一番。當正花(或無花)同難度比較低嘅平糊(一番),再加上幸運嘅自摸(一番),三者複合起來,喺四番封頂嘅制度入面,威力強大。

有見及此,先加入清一色為「雙辣」打法,繼而封頂番數去到六番至八番,但同時又為咗避免雞糊牌泛濫,而加入「起糊制度」,初時為一番起糊,即係話食糊嗰陣手牌起碼要有一番,唔能夠雞糊。後來又發覺一番起糊「未夠喉」,嗰啲一番嘅牌型(如:平糊、番牌、花牌、自摸等)就算「造」到,亦都冇太大滿足感,所以逐漸演變成兩番、甚至三番起糊嘅玩法。

根據自訂規則,現時通常以三番起糊,最大以打八番或十番為上限(網絡遊戲比較常見最大打十三番)。

流程[編輯]

牌牆、門風同打牌順序示意圖

開始前,首先要準備一副完整嘅現代蔴雀牌,包括:一至九筒、一至九索、一至九萬,以及東、南、西、北、中、發、白呢七隻番子,上述每款牌有四隻。另外仲要兩臺花,通常爲:春、夏、秋、冬;梅、蘭、菊、竹。其中春、梅代表東位;夏、蘭代表南位;秋、菊代表西位;冬、竹代表北位。

標準嘅香港蔴雀會使用上述144隻牌。如果唔打花牌,噉洗牌前就抽起兩臺花先,淨係用136隻牌。

選擇座位[編輯]

選擇座位嘅做法有多種,比較簡單嘅做法就係喺蔴雀牌中攞出風牌「東、南、西、北」各一隻向下放,等四位玩家每人抽一隻,並按結果坐喺佢嘅「風位」(又稱「門風」)上面。門風以逆時針計算,同指南針啱啱相反。比如某玩家坐喺東位,係噉佢嘅右邊係南位,左邊係北位,對面係西位。此外,蔴雀嘅打牌依「東→南→西→北→東……」順序進行,因此自己左邊嘅玩家係上家,右邊嘅係下家,對面嘅就係對家。

洗牌、疊牌[編輯]

入坐以後,四位玩家要將所有牌牌面向下放喺枱上,再將枱上嘅牌隨機「洗」(撥動)一段時間,直到啲牌洗勻為止。然後,每人將其中36隻牌上下排成18棟(如果唔打花牌,則每人將其中34隻牌上下排成17棟),每棟[2]兩隻,打橫排好,並推開一段距離。四個人都完成後,所有牌喺牌枱排得就似一個圍牆,所以呢啲牌亦稱為牌牆或牌山。

開門、配牌[編輯]

每人都攞咗12隻牌之後,莊家(東位)就會跳牌,攞取圖中暗藍色嘅兩隻牌。南位、西位、北位嘅玩家就喺莊家跳牌後順序攞下一隻牌

莊家即每局嘅東家,而其餘三家就稱爲閒家。開門方位則由擲決定。骰仔應當係顯示咗一點至六點嘅六面骰

舊時嘅開門方法係先由莊家擲一粒骰決定開門方位,再由開門人擲多一粒,加起來決定跳過嘅數目。但係現代則一般直接由莊家(東位)擲兩或者三粒骰子,決定開門方位,同時決定跳過相應嘅棟數攞牌。數方位嗰陣,莊家應以自己作「1」,按逆時針順序數起。擧例說,假如莊家(東位)擲出8點,佢要先以自己作「1」,逆時針順序數至8,停喺北位(上家)之上。

  • 如骰子數目係5、9、13、17,即係莊家自己;
  • 如骰子數目係2、6、10、14、18,即係下家;
  • 如骰子數目係3、7、11、15,即係對家;
  • 如骰子數目係4、8、12、16,即係上家。

於是,莊家(東位)要由北位(上家)嘅牌牆開門。佢必須喺北位牌牆中,由開始處順時針數起,跳過8棟牌開門,由第9棟開始攞起,進行配牌。要留意嘅係,由牌牆數牌、摸牌嘅順序係順時針方向,同打牌次序啱啱相反。初學者成日會搞錯方向,因此而攞錯牌。玩家應牢記「逆時針打牌,順時針摸牌」呢個規定。

配牌嗰陣,每人會一次攞兩棟,即四隻,然後到下家配牌,直到每人都有12隻為止。如果攞到超過第18棟(無花牌嗰陣就超過第17棟),就銜接到上家嘅牌牆,保持順時針方向繼續配牌。跟住,莊家就會跳牌,喺牌牆頭頂攞一隻,跳過一棟,再攞一隻,之後每位閒家攞一隻。最終莊家就會有14隻牌,而閒家就會有13隻。

配好牌後,各玩家可以分類整理手中嘅牌,整齊排列,審視牌勢。如果嗰時手中已有花牌,就要補花,即係由牌牆嘅尾端攞牌,攞牌數同花牌數一致。首先由莊家補花,如補上花牌,可繼續補。跟住再由南家、西家、北家依次序補花。

打牌[編輯]

完成整理手牌、補花嘅步驟後,由莊家開始,依逆時針次序,每位玩家都按照以下程序打牌,直到牌局結束:

  1. 由牌牆入面摸一隻牌(莊家跳牌嘅程序實際上係攞好13隻牌加第一次摸牌,所以莊家起手嗰陣會跳過呢步驟);
  2. 如果上家棄置嘅牌,能夠同自己手上嘅牌組成順子、刻子或槓子,可以唔由牌牆入面摸牌,改爲將嗰隻棄牌攞到自己面前,並翻開嗰組順子、刻子或槓子;
  3. 如果手牌已完成食糊牌型,可選擇嗌「自摸食糊,牌局結束;
  4. 選擇加槓暗槓,槓後都要即時喺牌牆尾端補牌;
  5. 摸到花牌後,唔理係唔係同自己嘅風位(門風)配合,都要翻開,並立即喺牌牆尾端補牌;
  6. 打出一隻牌。(被打出嘅啲牌稱爲「棄牌」。)

但係遇到以下情況嗰陣,可以打斷原來嘅打牌順序:

  1. 其他玩家嘅棄牌能跟自己手上嘅牌組成刻子,可選擇嗌「碰」,將人哋打出嘅牌攞到自己面前,並翻開嗰組刻子,跟住打出一隻牌;
  2. 其他玩家嘅棄牌能跟自己手上嘅牌組成明槓嘅槓子,可選擇嗌「槓」,將別人打出嘅牌攞到自己面前,並翻開嗰組槓子,跟住由牌牆尾端補牌,再打出一隻牌;
  3. 其他玩家「出衝」,即係佢嘅棄牌可以同自己嘅手牌組成食糊牌型,可選擇嗌「食糊」,牌局結束;
  4. 其他玩家槓牌嗰陣,如果嗰隻牌能夠跟自己手上嘅牌組成食糊牌型,就可以選擇搶槓並食糊,牌局結束。但如果其他玩家係暗槓,就只有十三幺至可以搶暗槓。

如果打牌順序被打斷,但牌局未結局,係噉打斷者打出其棄牌後,繼續依逆時針次序,輪到佢下家打牌。

由莊家打牌起,至北位玩家完成打牌,稱爲「一巡」。根據一般嘅規則,喺同一巡中,如果有其他玩家打出能夠令自己食糊嘅啲牌,但自己放棄咗食糊,就喺嗰巡內有另一位玩家打出同一張牌嗰陣,亦都唔可以嗌食糊,只能靠自摸,或者等其他玩家打出第二張可以食糊嘅牌。

如果牌局結束,則計算各玩家得分加減,然後開始下一局,直至一雀完成(或至少完成嗰圈)。

雀、圈、局[編輯]

圈風器

正常嘅蔴雀遊戲,以一雀爲基本單位。一雀入面有四圈,順序爲東圈、南圈、西圈、北圈。而每圈入面預設有四局。第一局比賽稱爲東圈東局(口語入面會省略末尾嘅「局」字),由東位嘅玩家擔任莊家。如果嗰局由閒家贏咗,嗰局完結後,就會由本來坐喺南位嘅玩家擔任莊家,稱爲「過莊」,下一局就會係東圈南局,原來南位嘅玩家會變成東位,原來西位嘅玩家會變成南位,如此類推。如果冇任何玩家贏出(即係流局),或者莊家自己贏咗,就要「冧莊」(「冧」讀lam6),佢會繼續擔任莊家,進行東圈東局嘅第二戰,各人嘅門風亦都唔會變。爲清楚計,玩家會將圈風器放喺莊家面前,並顯示住嗰圈嘅圈風。

就係噉,東圈西局、東圈北局都依次完成咗,就會進入南圈之戰,再次由東位玩家擔任莊家,展開南圈東局。圈風器顯示嘅文字會由「東」變成「南」。順序完成咗南圈南局、南圈西局、南圈北局後,就進入西圈,如此推類。直至北圈北局完結,即完成咗四圈對戰後,噉就算結束一雀。

以下係一個一雀對戰嘅例子:

兩次冧莊嘅一雀對戰例子
圈風 玩家1門風 玩家2門風 玩家3門風 玩家4門風 嗰局結果

東局 東(莊家) 西
南局 東(莊家) 西
西局 西 東(莊家)
北局 西 東(莊家)

東局 東(莊家) 西
南局 東(莊家) 西
西局 西 東(莊家) 無人贏(流局)
西局冧莊 西 東(莊家) (門風同上局一樣)
北局 西 東(莊家)
西
東局 西 東(莊家) 西
南局 東(莊家) 西
西局 西 東(莊家)
北局 西 東(莊家)

東局 東(莊家) 西
南局 東(莊家) 西 莊家贏咗
南局冧莊 東(莊家) 西 (門風同上局一樣)
西局 西 東(莊家)
北局 西 東(莊家)

爲咗加快雀局嘅進行,亦有唔少玩家喺流局嗰陣會照樣過莊,淨係得莊家自己贏咗先要冧莊。如果係噉,上面例子嘅南圈西局就唔使冧莊,淨係得北圈南局要冧莊。

番種、番數[編輯]

香港蔴雀,傳統「三三制」計算嘅番數唔大(小三元只計三番)、番種亦都少好多。但現時由其他地區(廣東、台灣、日本等)嘅蔴雀引入咗新番種,如坎坎糊、九子連環、十八羅漢等。加上封頂番數變得比較大(八番或以上),如小三元現時就計五番。詳細睇:

電子遊戲[編輯]

採用香港蔴雀規矩嘅網絡/電子遊戲有:

  • 《Yahoo! HK Games》嘅AGames蔴雀
  • 明星三缺一》系列嘅香港13張蔴雀
  • 《神來亦都》13張香港蔴雀
  • 街機《蔴雀皇》

睇埋[編輯]

參考[編輯]

  1. 簡而清:《開檯》,香港:博益出版集團,1986。
  2. 「棟」又稱「墩」。

出面網頁[編輯]

  • "香港蔴雀算分方式". 原著喺2016-04-01歸檔. Unknown parameter |deadurl= ignored (help)
  • 蔴雀番數計法
  • 花式及番數(廣東牌)