香港蔴雀食糊牌型

出自維基百科,自由嘅百科全書
跳去導覽 跳去搵嘢

蔴雀係一種源自中國嘅策略遊戲,喺廣東香港非常普及,本表列出香港蔴雀(即係「清章」或者「舊章」)嘅食糊準則同牌型。如果要查詢純粹「新章」嘅食糊牌型,請睇廣東蔴雀食糊牌型

食糊準則[編輯]

喺蔴雀遊戲中贏出,香港叫「食糊」或者「糊牌」,而唔係「和牌」。香港蔴雀遊戲規則,係最快集齊食糊牌型就贏。標準嘅食糊牌型爲「四組一對」,即係集齊「順子」或者「刻子」共四組(「刻子」亦都可以作「槓子」),加埋「眼」一對。好似下例噉:

標準食糊牌型例子同佢嘅組成分析
五萬六萬七萬 七萬七萬七萬 九萬九萬九萬九萬 中中中 西西
順子 刻子 槓子 刻子

由例子度可以見到,順子係三隻順序嘅同門數字牌,刻子係三隻相同嘅牌,槓子係四隻相同嘅牌,眼係兩隻相同嘅牌。

有個別特殊牌型屬於例外,例如「十三幺」。(唔計自訂規則,香港蔴雀嘅標準牌型中,淨係得「十三幺」係例外。)

食得糊嗰陣,玩家應該即刻嗌「食糊」、「食」或者「糊」,然後將手牌全數翻開(現時亦有唔嗌只翻開全數手牌),證明佢已經湊成有效嘅食糊牌型。如果佢既唔嗌,亦都唔翻開手牌,就視爲放棄嗰次食糊,並繼續行牌。

香港蔴雀本身係可以無番食糊,叫做「雞糊」,以前多數打「雞四」,亦即係雞糊「零番」嚟做起糊,四番就封頂。亦可以選擇四番為滿糊,然後清一色「雙辣」,例牌「三辣」嚟計算。「雙辣」同「三辣」即係按四番嘅價錢,「雙辣」以倍半或者雙倍計算、同「三辣」以雙倍或者三倍計算。因「番」呢個詞係「翻倍」嘅意思,因此食糊每多一番,價錢就翻多一倍。而雙辣同三辣就控制最高注碼喺四番嘅兩倍(正常計算嘅係五番至六番)同四番嘅三倍(六番以上)。

不過現時一般唔承認雞糊;打較大上限番數嗰陣,食糊最少要有三番,叫做「三番起糊」。上限番數嘅食糊牌型就爲「例牌」,一般會採用八番例牌、十番例牌或者十三番例牌,叫做「爆棚」(相當於日本蔴雀嘅役滿)。下表中註明「例牌」嘅段落裏所列出之牌型,都可以統一計算上限番數,例如即使「大三元」同「坎坎糊」都列喺八番嗰度,但係假如賽前玩家統一以十番作爲「爆棚」番數,並且視呢兩種牌型爲上限番數例牌,係噉,嗰雀局裏就會視「大三元」同「坎坎糊」作十番爆棚計算。

有啲玩家更會使用無截糊嘅準則(多喺打全銃制中使用),打出一張牌多家可同時食糊,叫做「一炮多響」或者「炮炮響」嘅玩法,即係每家食糊通通有效。

賭得比較大嘅人會選擇打無限番,呢個時候例牌亦都按普通番種計算番數(例如大四喜複計混一色對對糊或者字一色,加起嚟就超過十三番例牌);所以「天糊」同「地糊」等奇牌,一定要事先說明例牌番數。

下表根據標準番數列出各種食糊牌型。有啲牌型,玩家或者會自行修訂唔同規例,改變所計算嘅番數,就加以附註。

零番[編輯]

  • 雞糊(無番糊):食糊後牌面數唔出任何番種數(花牌唔計算喺度)。如果按現時通行嘅「三番起糊」玩法,就只能喺其他條件上已經滿足咗三番嘅要求,先至可以食雞糊,例如已經有兩張正花然後自摸。
例:一筒二筒三筒三索三索三索五索六索七索六萬七萬八萬東東

一番[編輯]

  • 無花:冇花牌。
  • 正花:花牌同座位嘅風位(門風)吻合。
1號:春春或者梅梅等於東。
2號:夏夏或者蘭蘭等於南。
3號:秋秋或者菊菊等於西。
4號:冬冬或者竹竹等於北。
  • 門前清(門清)[1]:全副牌靠自己摸,冇翻開過牌,冇上、碰或者槓過牌之下直接食糊,唔可以開暗槓[2]。(採用花牌嗰陣唔計算。)
  • 平糊[3]:淨係得順子,冇刻子嘅食糊牌型。眼可以係番子[4]
例:一筒二筒三筒五筒六筒七筒二索三索四索六萬七萬八萬東東
  • 自摸︰食糊嘅牌係自己摸返嚟嘅。(如本身叫雞糊嗰陣自摸即係滿足一番起糊嘅條件,俗稱「自摸雞」。)
  • 番牌:有以下番子嘅刻子。
    • 三元牌:紅中、發財、白板。
    例:發發發任何牌任何牌任何牌任何牌任何牌任何牌任何牌任何牌任何牌任何牌
    • 風牌:東、南、西、北。須吻合門風(東家碰/槓出東可獲一番)或者圈風(南圈碰/槓出南可獲一番)。門風同圈風重疊嗰陣計兩番(西圈西家碰/槓出西將會複計成兩番)。
    例:西西西任何牌任何牌任何牌任何牌任何牌任何牌任何牌任何牌任何牌任何牌(自己喺西位,一番)
    例:南南南任何牌任何牌任何牌任何牌任何牌任何牌任何牌任何牌任何牌任何牌(嗰局爲南圈,一番)
    例:東東東任何牌任何牌任何牌任何牌任何牌任何牌任何牌任何牌任何牌任何牌(嗰局爲東圈,自己喺東位,兩番)
  • 搶槓[5]:人哋加槓咗自己叫嘅牌。額外承認十三幺搶暗槓[6]
  • 槓上自摸(槓上開花):明槓/暗槓/加槓嘅槓上自摸,補花後唔算,另計自摸[7]
  • 海底撈月:食出最後一隻自摸牌,另計自摸。(但槓上開花最後一隻牌自摸唔計算海底撈月[8]。)
  • 花幺九(花幺/混老頭)[9]:淨係得幺九同番子嘅對對糊。(另計對對糊、番牌。)
例:一索一索一索九索九索九索一萬一萬一萬西西西發發

兩番[編輯]

  • 一臺花:集齊同一系列嘅花牌(即係「梅、蘭、菊、竹」或者「春、夏、秋、冬」),唔再計同系列嘅正花。(如果東家攞到「梅、蘭、菊、竹」同「春」,計算「一臺花」同「春」共三番。)
例:春夏秋冬 或者 梅蘭菊竹

三番[編輯]

  • 花糊:集齊七隻花牌可即刻倒牌,計三番自摸。詳見花糊牌規
例:春夏秋冬梅蘭菊
  • 對對糊(碰碰糊):淨係得刻子,冇順子嘅食糊牌型。可另計混一色或者清一色。
例:一索一索一索六萬六萬六萬八萬八萬八萬九萬九萬九萬西西
  • 混一色:淨係得一門數字牌(筒/索/萬)同番子嘅食糊牌型。(另計番牌。)
例:一萬一萬一萬三萬四萬五萬七萬七萬九萬九萬九萬西西 + 七萬
例:一萬一萬一萬三萬四萬五萬七萬七萬九萬九萬九萬西西 + 西

五番[編輯]

  • 小三元[10]:以中、發、白組成兩個刻子,一對眼嘅食糊牌型。(原本小三元計三番,再加兩番三元牌刻子嘅番數,為方便計算直接寫成五番。)可另計混一色、對對糊、對對糊加混一色或者字一色。
例:中中中發發發白白四萬五萬六萬二筒二筒二筒

六番[編輯]

  • 小四喜[11]:以東、南、西、北組成三個刻子,一對眼嘅食糊牌型。唔再計門風、圈風,但另計混一色、對對糊加混一色或者字一色,所以最少有九番。

例:東東東南南南西西西北北一索二索三索

七番[編輯]

  • 清一色[12]:淨係得一門數字牌(筒/索/萬),冇番子嘅食糊牌型。
例:一萬一萬一萬二萬三萬四萬五萬五萬七萬七萬七萬九萬九萬九萬

八番[編輯]

  • 大三元[13]:集齊中、發、白三個刻子嘅食糊牌型。(原本大三元計五番,再加三番三元牌刻子嘅番數,為方便計算直接寫成八番。)
例:中中中發發發白白白四萬五萬六萬二筒二筒
  • 槓上槓自摸[14]:連續開兩/三個槓之後自摸食糊,即使槓上摸到嘅牌唔係加槓嘅牌,亦可視作槓上槓自摸[15]。每槓之間要補花就唔算槓上槓。如果果第一槓係明槓,出槓者包。當包自摸計(四連槓嘅自摸計十八羅漢例牌,第一槓係明槓,出槓者包。當包自摸計。[16])。另計番子牌,對對糊,清一色或者混一色。
  • 大花糊(八仙過海)[17]:集齊八隻花可即刻倒牌,計八番自摸。詳見花糊牌規
例:春夏秋冬梅蘭菊竹
  • 坎坎糊(四暗坎/四暗刻)[18]:冇碰或者槓過嘅對對糊,唔可以開暗槓[19]。食糊嗰陣,如果係單吊就可以食出銃或者自摸,但如果係雙眼對碰就必定要靠自摸先至算坎坎糊[20]。(亦有無論係雙眼對碰或者係單吊叫糊,必定自摸至算坎坎糊嘅要求。)另計番子牌、清一色或者混一色,但唔再計門前清,對對糊。「坎」字作蔴雀術語嗰陣,讀粵拼kaan2音。

十番(例牌)[編輯]

  • 字一色[21]:淨係得番子嘅食糊牌型。(另計番牌,但唔再計對對糊。)
例:東東東南南南西西西中中中發發
  • 清幺九(幺九/清幺/清老頭)[22]:淨係得一、九嘅食糊牌型,唔再計對對糊。
例:一索一索一索九索九索九索一萬一萬一萬九萬九萬九萬九筒九筒
  • 九子連環(九蓮寶燈)[23]:門清集齊同門數字牌「一、一、一、二、三、四、五、六、七、八、九、九、九」另加任何一隻同門(筒/索/萬)牌子嘅食糊牌型。唔係純正嘅九子連環(即係僞九子連環/變九蓮寶燈/九蓮花燈)亦都得,例如門清手牌為「一、一、一、二、二、三、四、六、七、八、九、九、九」,如果糊出「五」亦可視作九子連環。(唔另計清一色、門前清。)
例:一萬一萬一萬二萬三萬四萬五萬六萬七萬八萬九萬九萬九萬 + 五萬
例:一萬一萬一萬二萬二萬三萬四萬六萬七萬八萬九萬九萬九萬 + 五萬

十三番(例牌)[編輯]

  • 天糊:莊家一開牌就食糊。(可以食雞糊,補花後可以食,暗槓後食糊就唔算天糊。)[24]
  • 地糊:食莊家打出嘅第一隻牌。(莊家或者閒家補花後仲可以食,但莊家開咗暗槓後食莊家打出嘅第一隻牌就唔算地糊。)[25]
  • 大四喜[26]:以東、南、西、北組成四個刻子嘅食糊牌型。
例:東東東南南南西西西北北北一筒一筒
  • 十三幺[27]:以門清集齊十三種幺、九同番子牌,包括:一、九萬;一、九索;一、九筒;東、南、西、北;中、發、白(各一張),再加其中一張做眼。唯一可以搶暗槓嘅牌種[28]
例:一筒九筒一索九索一萬九萬東南西北中發白 + 白
  • 十八羅漢(四槓子)[29]:開咗四個槓嘅食糊牌型。(被喻為最難食糊牌型。)
例:二筒二筒二筒二筒三索三索三索三索五萬五萬五萬五萬東東東東發發

其他自訂食糊牌型番數[編輯]

以下牌型並唔係標準「清章」蔴雀所有,但根據唔同自訂規例,有部分玩家亦都會接受作有效牌型番數。如果係噉,必須喺開檯前講明。

  • 一番
    • 二同順(般高):攞到兩副相同嘅同門順子。如果只接受標準「清章」牌型,就視作零番。
    例:二筒三筒四筒二筒三筒四筒 一索一索一索七索七索七索北北
    • 二步高(般低):攞到兩副同門嘅順子,其中一組嘅數字須爲另一組嘅遞進1。例如一組係「四、五、六」,另一組係「五、六、七」。如果只接受標準「清章」牌型,就視作零番。
    例:一萬二萬三萬二萬三萬四萬 一索一索一索七索七索七索北北
  • 二番
    • 三同順(三般高):攞到三副相同嘅同門順子,可另計混一色或者清一色,唔另計平糊。如果只接受標準「清章」牌型,就視作零番,或者視作三個刻子計(冇上牌翻開嗰陣)。
    例:二筒三筒四筒二筒三筒四筒二筒三筒四筒 七索七索七索北北
    • 三步高(三般低):攞到三副同門嘅順子,其中一組嘅數字須爲另一組嘅遞進1,第三組就再遞進1。例如一組係「四、五、六」,另一組係「五、六、七」,第三組係「六、七、八」。可另計混一色或者清一色,唔另計平糊。如果只接受標準「清章」牌型,就視作零番。
    例:一萬二萬三萬二萬三萬四萬三萬四萬五萬 一索一索一索北北
    • 一條龍(一氣通貫):擁有同門一至九嘅牌,唔另計平糊。如果只接受標準「清章」牌型,就視作零番。
    例:一萬二萬三萬四萬五萬六萬七萬八萬九萬一筒一筒一筒六索六索
  • 三番
    • 人糊:喺第一輪因有人出銃而食糊。計三番或者例牌。
    • 鐘鼓齊鳴(槓爆):海底撈月兼槓上自摸。計三番或者例牌自摸。
    • 鏡糊糊:兩門數字牌兩種相同順子。如果只接受標準「清章」牌型,就視作零番。
    例:二筒三筒四筒六筒七筒八筒二萬三萬四萬六萬七萬八萬發發
    • 雙龍抱(兩般高):攞到兩副般高。如果只接受標準「清章」牌型,就視作零番。
    例:二筒三筒四筒二筒三筒四筒六萬七萬八萬六萬七萬八萬東東
    • 雙蛇抱(兩般低):攞到兩副般低。如果只接受標準「清章」牌型,就視作零番。
    例:二筒三筒四筒三筒四筒五筒六萬七萬八萬七萬八萬九萬西西
    • 四同順(全同順/同般高):攞到四副相同嘅同門順子,另計混一色或者清一色。如果只接受標準「清章」牌型,就視作零番,或者視作三個刻子同一個順子計(冇上牌翻開或者僅翻開一組順子嗰陣),但係可以另計混一色或者清一色。玩家喺遊戲中亦都可以考慮槓牌。
    例:二筒三筒四筒二筒三筒四筒二筒三筒四筒二筒三筒四筒 北北
    • 四步高(步步高/段橋):攞到四副同門嘅順子,其中一組嘅數字須爲另一組嘅遞進1,第三組再遞進1,第四組再遞進1。例如一組係「四、五、六」,另一組係「五、六、七」,第三組係「六、七、八」,第四組係「七、八、九」。另計混一色或者清一色。如果只接受標準「清章」牌型,就視作零番,但係可以另計混一色或者清一色。
    例:一萬二萬三萬二萬三萬四萬三萬四萬五萬四萬五萬六萬 北北
    • 三喜臨門(三風刻):牌型有三個風刻,可另計對對糊、混一色,但唔另計門風或者/同圈風。如果只接受標準「清章」牌型,就視作零番,但係可以另計門風或者/同圈風。
    例:東東東南南南西西西二萬三萬四萬二筒二筒
    • 七對子(七對眼/嚦咕嚦咕):門清取得七對對子。未開槓嘅四張相同嘅牌,唔能夠算係兩對對子。如果只接受標準「清章」牌型,就唔算有效食糊牌型。
    例:三筒三筒五筒五筒二索二索七索七索六萬六萬八萬八萬九萬九萬
    • 三槓子:槓出三副牌,可另計對對糊。如果只接受標準「清章」牌型,就視作零番。
    例:二筒二筒二筒二筒三索三索三索三索六萬六萬六萬六萬 一萬二萬三萬一索一索
    • 雙色同刻:兩門數字牌兩組相同刻子,整幅牌冇順子,另計對對糊。如果只接受標準「清章」牌型,就視作零番,但係可以另計對對糊。
    例:一筒一筒一筒七筒七筒七筒一索一索一索七索七索七索南南
    • 四歸四:四隻相同嘅牌落到四個順子上,可另計混一色、清一色。如果只接受標準「清章」牌型,就視作零番,但係可以另計混一色、清一色。
    例:一筒二筒三筒二筒三筒四筒三筒四筒五筒三筒四筒五筒白白(留意三筒)
  • 十番
    • 萬綠叢中一點紅:由紅中代替發財嘅綠一色,或者有五索喺內嘅綠一色,但唔能夠既有紅中又有五索。如果只接受標準「清章」牌型,就淨係當做混一色(含順子、紅中或者發財)、混一色對對糊(唔含順子、含紅中或者發財)、清一色(含順子、唔含紅中或者發財)或者清一色對對糊(唔含順子、唔含紅中或者發財)計算,另計番子刻子嘅番。
    例:二索三索四索三索三索三索六索六索六索中中中八索八索
    例:二索三索四索三索三索三索四索五索六索八索八索八索發發
    例:二索三索四索三索三索三索五索五索五索發發發六索六索
    • 百萬石(百萬雄兵):清一色狀態所有牌數加起嚟等於或者超過一百,可另計對對糊、平糊,但唔另計清一色。
    例:六索七索八索六索七索八索七索八索九索九索九索九索四索四索
    例:六筒六筒六筒六筒七筒七筒七筒八筒八筒八筒九筒九筒九筒二筒二筒
  • 十三番
    • 藍一色:淨係得東、南、西、北、白板或者八筒嘅食糊牌型。如果只接受標準「清章」牌型,就淨係當做混一色對對糊(含八筒)或者字一色(唔含八筒)計算,另計番子刻子嘅番。
    例:八筒八筒八筒東東東南南南白白白北北
    • 綠一色:淨係得二、三、四、六、八索或者發財嘅食糊牌型。如果只接受標準「清章」牌型,就淨係當做混一色(含順子、發財)、混一色對對糊(唔含順子、含發財)、清一色(含順子、唔含發財)或者清一色對對糊(唔含順子、唔含發財)計算,另計番子刻子嘅番。
    例:二索三索四索三索三索三索六索六索六索八索八索八索發發
    • 紅孔雀:淨係得一、五、七、九索或者紅中嘅食糊牌型。如果只接受標準「清章」牌型,就淨係當做混一色對對糊計算,另計番子刻子嘅番。
    例:一索一索一索五索五索五索七索七索七索中中中九索九索

包牌規則[編輯]

落地即係碰牌、上牌、槓牌嗰陣所翻開嘅牌(或者翻開牌呢個動作)。根據傳統,如果打陪銃制:任何食糊嘅九章落地出銃(一半)、十二章落地自摸。

以下係打全銃制,通常嘅包牌罰則包括:

  • 清一色落地:九章落地後,打出同色牌,畀人上、碰或者明槓嗰陣成立。
  • 清幺九落地:一、九筒,一、九索,一、九萬嘅任何三種刻子落地後,打出其餘任何一種,畀人碰或者明槓嗰陣成立。
  • 字一色落地:東、南、西、北、中、發、白任何三種刻子落地後,打出其餘任何一種,畀人碰或者明槓嗰陣成立。
  • 大三元落地:中、發、白其中兩種刻子落地後,打出剩低嗰種,畀人碰或者明槓嗰陣成立。如果嗰玩家大三元九張落地後,仍有其他玩家令嗰玩家十二張落地(包括混一色、混一色加對對糊或者字一色狀態),就由令佢十二張落地嘅玩家包自摸,俗稱包後唔包先
  • 大四喜落地:東、南、西、北其中三種刻子落地後,打出剩低嗰種,畀人碰或者明槓嗰陣成立。
  • 十八羅漢落地:出現第三槓嗰陣,打出生張牌(冇玩家打過出嚟嘅牌),畀人明槓第四次嗰陣成立。
  • 十二張落地:當打出嘅一張牌令一名玩家十二張落地(唔理任何牌型,包括雞糊),包括令佢數次開加槓或者暗槓後進入單吊嘅狀態嗰陣,都要包自摸。

包牌規則成立嗰陣,如果以上述牌型自摸嗰陣,其他兩家嘅損失由包牌者負擔。如果其他兩家出銃,就由出銃者負擔。

詐糊罰則[編輯]

詐糊嘅定義:打開咗所有牌(未必係14隻,可能夠會大小相公)之後唔能夠糊出[30]。例如打開咗一副唔能夠糊嘅牌型,或者係唔夠起糊嘅番數(通常係三番)。

根據慣例,因為食詐糊者阻礙咗牌局嘅進行,以同大家做大牌嘅機會,所以食咗詐糊必須對每家賠出番數上限嘅分數。即係說如果打最大八番,就要每家賠自摸八番價錢。

花糊牌規[編輯]

  • 通常情況下,花糊計三番自摸,大花糊計四番至八番或者例牌自摸。
  • 可選擇唔食糊,補咗花後就唔可以食糊。(閒家一開牌七隻花以上除外,見下文。)
  • 根據唔同自訂規例:槓上自摸花糊計四番自摸,如果係明槓嘅話就由出槓者包,暗槓或者加槓嘅話家家賠。
  • 根據唔同自訂規例:槓上槓自摸大花糊當例牌自摸計,如果第一槓係明槓嘅話就由出槓者包,第一槓係暗槓或者加槓嘅話家家賠。
  • 根據唔同自訂規例:莊家一開牌七隻花以上當天糊,如果一開牌少於七隻花嘅話,經過數次補花後集齊七隻花,亦可當做天糊(暗槓後唔算)。
  • 根據唔同自訂規例:閒家一開牌七隻花以上,要補花同等到自己第一次摸牌嘅機會先至可以食花糊(齊14隻牌),唔計地糊。自己曾經上、碰過或者過咗自己第一個摸牌嘅機會之後唔可以食糊。
  • 根據唔同自訂規例:玩家如果已經持有七隻花,可以選擇等待第八隻花,而唔食花糊。如果選擇等待而摸到第八隻花嘅話,計大花糊。

分數計算[編輯]

傳統蔴雀以四番為滿糊,隨後以半辣上,每兩番先至跳一倍。(賭得比較大嘅人亦會辣辣上,每一番跳一倍。)

分數計算(全銃制)
番數 出銃 ($) 自摸
0(雞糊) 1 (自摸最少一番)
1 2 3 (1 x 3)
2 4 6 (2 x 3)
3 8 12 (4 x 3)
4(滿糊) 16 24 (8 x 3)
5 24 36 (12 x 3)
6 32 48 (16 x 3)
7 48 72 (24 x 3)
8 64 96 (32 x 3)
9 96 144 (48 x 3)
10(細爆) 128 192 (64 x 3)
11 192 288 (96 x 3)
12 256 384 (128 x 3)
13(爆棚) 384 576 (192 x 3)

註釋[編輯]

  1. 根據唔同自訂規例,採用花牌嗰陣,亦可加入門前清計番。
  2. 根據唔同自訂規例,暗槓如果無需翻出嚟(採用臺灣蔴雀規例)嘅話,門前清就可以開暗槓。
  3. 同「雞糊」唔同
  4. 根據唔同自訂規例,眼唔可係番子,同埋/或者唔可叫糊食卡窿、偏張、單吊。
  5. 根據唔同自訂規例,搶槓當自摸,開槓者包。使用無截糊嘅準則嗰陣,如果有兩家以上同時搶槓,當齊齊自摸,開槓者需要包晒畀所有食糊玩家
  6. 根據唔同自訂規例,十三幺只作普通例牌計算,唔能夠搶暗槓。
  7. 根據唔同自訂規例,槓上開花一律計兩番自摸。明槓出槓者包。
  8. 根據唔同自訂規例,日本蔴雀分開海底撈月(自摸嗰陣)同河底撈魚(人哋打出嗰陣),但兩者都係加一番,而香港蔴雀淨係得自摸最後一隻牌先至算,人哋打出最後一隻牌就唔算。
  9. 根據唔同自訂規例,會視爲三至六番計。
  10. 根據唔同自訂規例,會視爲三至六番計。
  11. 根據唔同自訂規例,會視爲四至十番或者例牌計。
  12. 根據唔同自訂規例,會視爲六至十番計。清一色平糊計八番,清一色對對糊就計十番。
  13. 根據唔同自訂規例,會視爲五至八番或者例牌計。
  14. 根據唔同自訂規例,會視爲二至八番或者例牌自摸計。(傳統蔴雀以四番為滿糊,每槓只加一番,槓上槓加兩番。)
  15. 根據唔同自訂規例,如果開跟第一槓嘅補牌唔同嘅槓後自摸,只額外計算普通槓上自摸(一番)。
  16. 根據唔同自訂規例,明槓後嘅槓上槓自摸一律當普通自摸計,家家賠,出槓者唔用包。
  17. 根據唔同自訂規例,會視爲四番至八番或者例牌計。
  18. 根據唔同自訂規例,會視爲五至八番或者例牌計。唔另計對對糊。香港蔴雀坎坎糊只係四暗刻,唔似臺灣五暗刻難,唔應該計上限例牌番數。(臺灣蔴雀中四暗刻係五番、五暗刻係八番。)
  19. 根據唔同自訂規例,如果暗槓唔用翻出嚟(採用臺灣蔴雀規例)嘅話,坎坎糊就可以開暗槓。
  20. 根據唔同自訂規例,單吊可以糊出銃牌,但如果雙眼對碰之下糊出銃牌就只當作門前清對對糊計算。
  21. 根據唔同自訂規例,會視爲清一色對對糊計,最少十一番。
  22. 根據唔同自訂規例,唔當做例牌(唔另計對對糊)。
  23. 根據唔同自訂規例,只當清一色計。(以前香港蔴雀九子連環係冇番計嘅。)
  24. 根據唔同自訂規例,可以食花糊。
  25. 根據唔同自訂規例:閒家第一隻牌就自摸,可以食地糊。(如果輪到自己之前嘅牌已經畀人上、碰、槓過就唔算。)
  26. 根據唔同自訂規例,會視爲十番至十三番或者例牌計。(唔再計門風、圈風同對對糊。)
  27. 根據唔同自訂規例,俗稱「牌王」,能夠搶暗槓,唔可以畀人截糊(十三幺截十三幺例外)。
  28. 根據唔同自訂規例,只作普通例牌計算,唔能夠搶暗槓亦可以畀人截糊。
  29. 根據唔同自訂規例,會視爲十至十八番。或者唔當做例牌計。(唔再計對對糊。)
  30. 根據唔同自訂規例:如果喺違反糊一唔糊二(喺同一巡內唔食第一隻人哋打出嘅牌,而選擇食第二隻牌)嘅情況下打開咗牌都計作詐糊。(打出唔食糊,但自摸同一隻牌後翻牌就唔當詐糊。)

睇埋[編輯]

出面網頁[編輯]

  • 香港大專聯校蔴雀大賽2017 - 比賽規則(為方便比賽計分,將小四喜、坎坎糊、槓上槓自摸、大花糊、字一色、清幺九、九子連環、天糊、地糊、十三幺、大四喜、十八羅漢等,列為十番例牌。)
  • 香港中文大學學生會 蔴雀研究學會:第二屆中大雀皇之皇蔴雀大賽大賽規則(為方便比賽計分,將小四喜、坎坎糊、槓上槓自摸、大花糊、字一色、清幺九、九子連環、天糊、地糊、十三幺、大四喜、十八羅漢等,列為十番例牌。)
  • 花式同番數(廣東牌)
  • HolidaySmart 假期日常:【新手入門必睇・計番篇】麻雀計番教學~自摸混一色對對糊究竟幾多番?睇完就明!
  • "香港蔴雀算分方式". 原著喺2016-04-01歸檔. Unknown parameter |deadurl= ignored (help)網路遊戲 - 神來也 (同正式香港蔴雀計番唔同)