蕭峰
喬峰係金庸小說《天龍八部》其中一位主角，佢同蕭遠山、慕容博、鳩摩智並稱天龍四絕。喬峰本身係契丹人，由於被漢人養大而改名，而佢嘅真名係蕭峰。喬峰為人正派，義薄雲天，智勇雙全，豪氣萬丈，至情至性，有情有義，幾乎集金庸小說所有男主角嘅優點於一身，係一位近乎完美嘅英雄。普遍人認為喬峰係對應天龍八部嘅天眾（帝釋天）。
生平
[編輯]蕭峰係契丹人，佢一個月大嗰時父母為咗帶佢去探佢阿婆已經過雁門關俾中原武林圍攻，後來佢阿爸為咗殉情而將佢掟畀汪劍通，後來汪劍通同智光大師再將佢托畀喬三槐夫婦，並將佢改名喬峰。喬峰先後拜玄苦同汪劍通為師，但汪劍通一直唔放心喬峰，所以要喬峰破三大難題立七大功勞先肯讓丐幫幫主之位畀佢。後來喬峰達到佢嘅要求先成功就任丐幫幫主。由於喬峰武功高強同仁義兼備，所以江湖盛傳「北喬峰南慕容」。
後來由於伏牛派柯百歲同少林玄悲懷疑係俾慕容復殺死所要喬峰打算親自去江南去搵個水落石出以還慕容復清白。途中佢喺無錫松鶴樓認識段譽並同佢結拜做兄弟，之後佢喺杏子林同丐幫幫眾解釋兇案嘅元兇唔係慕容復。後來丐幫四長老叛變，喬峰自插四刀為長老贖罪。後來馬夫人叫徐長老請來單正、譚公、譚婆、趙錢孫同智光大師揭穿喬峰生世甚至想踢佢出幫，但喬峰唔相信並打算查個水落石出，喺佢走嗰時佢發誓一世唔會殺漢人。喺佢搵佢養父養母同師傅問佢生世時，佢哋先後俾人殺死，少林寺啲人都認為佢係殺人兇手所以打算圍攻佢，佢逃走嗰時無意間連累咗阿朱。為咗醫好阿朱，喬峰主動去聚賢莊赴約，並同昔日好友用斷義酒劃清界線，並求白世鏡代佢求薛神醫醫阿朱，之後喺聚賢莊大開殺戒，後尾佢俾黑衣人救走。佢好返嗰時打算去雁門關查探自己身世，並同阿朱喺雁門關重逢，甚至確認自己真係契丹人。由於佢俾阿朱嘅真誠打動，所以同阿朱立下塞外約。
為咗搵邊個係「帶頭大哥」，一直牽連咗十幾條人命，而佢懷疑嗰班人都係俾「大惡人」殺死。後來佢從智光大師口中得知佢身世，並用返佢真名蕭峰。後來佢喺馬夫人口中得知帶頭大哥係段正淳，並遠赴小鏡湖搵段正淳報殺父之仇，佢本身以為打死咗段正淳，點知原來嗰個段正淳係阿朱扮嘅，因為段正淳係阿朱個阿爸。喺阿朱死前，喬峰應承阿朱會代佢照顧阿紫。後來由於佢誤傷阿紫，所以佢帶阿紫去長白山搵人參，途中同完顏阿骨打同耶律洪基結為兄弟，原來佢位阿哥就係大遼皇上。後來由於佢為耶律洪基平定皇太叔之亂所以被封為南院大王。
後來蕭峰為咗救阿紫而率領燕雲十八騎上少林寺，俾莊聚賢、丁春秋同慕容復圍毆。之後再同虛竹段譽極為三兄弟大戰莊聚賢、丁春秋同慕容復三人。後來蕭峰喺少林寺同蕭遠山相認，原來佢一直所搵嘅「大惡人」就係佢阿爸蕭遠山，後來仲知道原來「帶頭大哥」係玄慈，之於三十年前雁門關之前嘅幕後主腦係慕容博。之後蕭遠山父子搵慕容博報仇，並俾掃地僧阻止，掃地僧甚至化解咗佢哋兩家嘅恩怨，最後蕭遠山慕容博出家為僧。
後來蕭峰答應佢阿爸阻止遼帝侵宋，之後佢同虛竹段譽去西夏競選駙馬。當西夏選完駙馬時，耶律洪基逼蕭峰攻宋，後來蕭峰打算跟阿紫逃出南京，點知中咗酒毒並困喺鐵籠。後來蕭峰被中原武林人士所救，並喺完顏阿骨打幫助下逃出雁門關。後來佢聯合虛竹段譽挾持耶律洪基，並以死相逼耶律洪基喺大遼三軍前拆箭立誓世唔可以率兵踏入大宋半步。後來蕭峰因為挾持皇上並認為自己愧對大遼，最終用兩枝斷箭插胸自殺。
武功
[編輯]- 丐幫
- 降龍十八掌（新修版改為降龍廿八掌）
- 打狗棒法
- 少林
- 龍爪手
- 其他
- 擒龍功
- 太袓長拳
- 排雲雙掌
- 降魔掌
關係
[編輯]- 阿爸：蕭遠山
- 阿媽：蕭遠山老婆
- 養父：喬三槐
- 養母：喬夫人
- 未婚妻：阿朱
- 姨仔：阿紫
- 岳父：段正淳
- 岳母：阮星竹
- 義兄：耶律洪基
- 義弟：段譽、完顏阿骨打、虛竹
- 義姨仔：穆貴妃、夢姑、王語嫣（新版改為木婉清）
- 師傅：玄苦、汪劍通、奚山河
- 仇人：段正淳（誤認）、玄慈、慕容博