蟹貨

套牢股票，香港叫「蟹貨」，中國大陸叫「套牢」，即係話投資者當時買入高過現價嘅股票，如果用現價賣出就會蝕錢。「蟹貨」嘅「蟹」係指投資者好似大閘蟹咁樣被綁住，郁唔到。除咗股票術語，如果買咗一批貨想轉賣搵大錢但係冇人要嘅都可以叫蟹貨。

有財經分析員相信，如果太多蟹貨嘅股票，日後都好難再炒上，因為當股價升番去某個價錢（即係「蟹貨區」），大批先前用呢個價錢買入呢隻股票嘅投資者就會爭住賣出套現，造成股價又跌過，搞到股票好難再炒上。互聯網泡沫之後嘅電訊盈科就係一個例子。

「蟹貨」投資者又叫做「蟹貨客」，佢哋嘅心情唔會好，因為後悔曾經買錯貨，無晒機會，睇到有其他投資好機會都無多餘現金再買，患得患失，唔知道手上嘅蟹貨幾時「返到家鄉」，即係升番去蟹貨區。