要求習近平總書記辭職公開信事件

出自維基百科,自由嘅百科全書
跳去導覽 跳去搵嘢

要求習近平總書記辭職公開信事件,係發生喺2016年中華人民共和國全國兩會期間嘅政治事件。

事件始末[編輯]

2016年3月4號深夜,有官方背景嘅新疆無界傳媒旗下嘅新聞媒體無界新聞喺佢網站《一帶一路》欄目,突然刊登一篇個名叫《關於要求習近平同志辭去黨和國家領導職務的公開信》嘅文章。公開信署名為「忠誠嘅共產黨員」,要求習近平辭咗包括總書記在內嘅黨同國家領導職務[1][2]

文章列舉多個要求習近平辭職嘅原因,指責習近平執政失敗,「唔具備帶領黨同國家走向未來嘅能力,唔適合再擔任總書記一職」,來源注明係「參與網」。發布之後無耐,無界新聞網站被關閉,唔能夠進入,之後恢復運作,公開信已被刪除。根據報道,無界方面向當局解釋畀黑客入侵,之後又解釋係傳媒軟件「自動抓取」功能所導致。正值全國政協會議開幕同全國人大會議召開嘅敏感時間,呢件事立即引起咗海外媒體嘅關注[3][4]

喺事件之後,無界新聞網站從3月15號開始,唔再撰寫新聞,只係轉發官媒報道。其後,多間外媒報道,無界新聞被結束營運,被遣散嘅員工被警告,唔可以向外界透露消息。消息話,喺事件後股東之一嘅阿里巴巴集團提出將無界傳媒清盤,得到另一個股東支持[5][6]

根據海外傳媒講,當局已組成項目組徹查事件,又懷疑事件係一個「巨大陰謀」,多個無界新聞員工因事件被拘捕,警方至少扣押咗20人,6個係網站無界新聞員工,包括無界傳媒董事長李萬輝,執行總裁歐陽洪亮、執行主編黃志傑、副主編程聖中,同兩個負責電腦安全技術嘅員工,另外10個人係信息技術服務供應商無界新輝嘅工作人員。《端傳媒》傳媒評論部前主編賈葭喺3月15號晚喺北京機場被公安帶走,據稱被認為同事件有關,被扣押10日之後喺25號獲釋。中國異見人士溫雲超話,佢喺中國嘅父母同兄弟都因此被捕。旅居喺德國嘅時事評論員長平話佢一家係因自己對呢件事嘅評論而被帶走[7][8]

3月30號,中國外交部回應公開信事件話:「任何企圖破壞中國國家穩定嘅行為,都唔可能得逞」[9]

5月7號,《明報》報道無界新聞網嘅執行主編黃志傑等幾個人已喺早前獲釋[10]

截至6月24號,重有多人未獲釋,歐陽洪亮嘅老婆劉某通過網絡發表公開信,話佢老公同程聖中等人已經被扣超過100日,重未能獲釋,又話財訊集團已經同歐陽洪亮單方面解約[11]

相關事件[編輯]

2016年3月底,《明鏡新聞》嘅網站又刊登一篇以171個「忠誠嘅中國共產黨員」名義發布嘅公開信,名叫《就立即罷免習近平同志黨內外一切職務告全黨、全軍、全國人民書》。呢封信嘅執筆人自稱是、係「來自黨政軍群等各個機關部門」,要求黨罷免總書記習近平。信入面更加話:「十九大必須實現八千幾萬黨員一人一票選舉總書記、黨中央、黨代表,唔經八千萬黨員直接選舉嘅總書記、黨中央將唔再具有任何嘅合法性」。不過《明鏡新聞》表示由於唔能夠確定呢封公開信嘅真實性,所以刊登之後無耐就將呢封公開信刪除[12]

睇埋[編輯]

[編輯]

  1. "刊"倒習公開信"遭清算 無界新聞被關停". 自由亞洲電台. 2016-02-23.
  2. "中共黨媒發文要求習近平下台 隨即被斷網刪文". 自由時報. 2016-03-05.
  3. "匿名信事件和中共黨內的權力焦慮". 紐約時報. 2016-03-30.
  4. "中國追查要求習近平辭職公開信的來源". 華爾街日報. 2016-03-28.
  5. "阿裡巴巴劃清界線 稱掛名注資". 香港蘋果日報. 2016-03-24. 原著喺2017-07-18歸檔. 喺2016-07-22搵到.
  6. "刊「倒習信」 無界新聞「失聯」傳停辦". 世界之聲. 2016-03-24.
  7. "中國 "因促習近平辭職信扣押20人"". BBC中文網. 2016-03-25.
  8. "資深媒體人賈葭獲釋但不能回家". RFA. 2016-03-26.
  9. "中國外交部就"無界新聞事件"首次做出回應". 法廣. 2016-03-28.
  10. "無界主編獲釋 北京辦公室易主". 明報. 2016-05-07.
  11. "被關押101天 家人發現無界傳媒被抓者已被"強制解約"". 法廣. 2016-06-25.
  12. "網上再現倒習公開信,來源和真偽". 美國之音. 2016-03-31.