試管肉

試管牛肉

試管雞肉一碟

試管肉（英文：test tube meat）係一種喺受控嘅實驗室或者工業環境入面，透過培養動物細胞而製成嘅肉類產品。呢類產品通常叫做培養肉（cultured meat）或者栽培肉（cultivated meat），屬於細胞農業（cellular agriculture）嘅一部分。試管肉係喺動物身體以外進行細胞培養，而唔需要飼養同屠宰成隻動物，最終產品係供人類食用嘅動物組織，而唔係植物性仿肉。

分類

試管肉屬於細胞農業嘅一種應用。細胞農業係指透過培養細胞，而唔係養殖完整動物，嚟生產肉類、奶類同蛋類等動物性產品嘅技術領域。現時研究同商業發展主要集中喺牛肉、豬肉、家禽（雞鴨）同海產呢啲傳統肉類，不過亦有研究探索其他物種同新型細胞來源，作為未來產品嘅可能方向。

生產

試管肉嘅生產通常由一個細細嘅活體活檢開始，喺仍然生存嘅動物身上取得幹細胞或者肌肉前驅細胞。呢啲細胞具備自我更新能力，並可以變成肌肉同脂肪組織。

細胞會放入含有豐富營養嘅培養液，並擺喺生物反應器入面，培養液會提供胺基酸、糖類、維他命、礦物質同生長因子。為咗形成接近傳統肉類結構嘅組織，研究人員通常會利用可食用支架材料，或者透過三維生物打印等技術，令細胞排列成具有結構嘅肌肉組織。

生產圖

生長因子

喺培養過程入面，細胞生長同分化需要依賴各類生長因子（growth factors），例如促進細胞增殖同肌肉分化嘅蛋白質。早期研究同部分實驗室階段嘅生產，常用一種叫做牛胎血清（fetal bovine serum，FBS）嘅培養基成分。胎牛血清係由牛胎血液提取，天然含有多種生長因子、激素同蛋白質，能夠有效支持動物細胞喺體外生長。

不過，由於牛胎血清屬於動物來源，用其引起倫理、成本同可持續性嘅爭拗，亦畀人批評削弱培養肉「用少啲動物」嘅理念。因此，近年研究同產業發展逐步轉向用「無血清培養液」，改用化學上清晰、非動物來源嘅營養配方，以及透過微生物，基因改造細胞，生產出重組嘅生長因子。有研究指，雖然而家無血清培養液仍然面對高成本同埋技術挑戰，但係視為培養肉實現大規模商業化，同提升動物福利嘅關鍵。

影響

潛在好處

支持者認為，試管肉有潛力大幅減少對密集式畜牧業嘅依賴，從而降低動物屠宰數量，並透過將肉類生產同飼養及宰殺動物分離，改善動物福利。此外，由於生產過程喺受控環境進行，培養肉亦可能減少部分屠宰場相關嘅病原體風險，並用少啲抗生素。部分研究指出，若果可以成功大規模生產，試管肉有機會減少用地嘅需求，並喺特定條件下降低部分溫室氣體排放。

潛在問題

批評嘅人話，試管肉現階段嘅生產成本仍然偏高，而技術上相當複雜，大型生產設施可能需要好多能源，令整體環境效益喺商業化規模全面評估之前，仍然唔穩陣。

另外，部分研究同政策分析亦關注培養基成分、食品安全、監管制度差異，以及消費者對於喺生物反應器入面培養出嚟嘅肉類，其安全性、營養價值同「天然程度」嘅接受程度呢啲問題。

監管同商業發展

截至2020年代中期，部分國家同地區已經開始批准培養肉作為食品出售，標誌住試管肉由研究階段逐步走向商業化。相關發展引起國際媒體廣泛關注。