詹小屏

詹小屏、梁濃剛婚禮。伴郎屠用雄，伴娘張敏儀。

詹小屏（Judi Jim；1944年—）係香港歌手、節目主持、電視幕後制作。喺香港嘅電台、電視台工作。喺商業電台早年，做唱片騎師。當初以忘不了的你唱到走紅。喺無綫電視早年，做編導兼主持。後期喺香港電台做幕後，做過節目八十年代面面觀，同埋聽歌學英文。

事業

讀瑪利諾修院學校 ，中間參加報社公開歐西歌唱比賽，得冠軍。咁受邀入商業電台，做節目主持，介紹歐西流行曲，可謂早年香港唱片騎師。放學孭書包去商業電台，主要做點唱，無乜介紹部份。當年商業電台重喺荔枝角，佢覺得風景非常好。一九六六年入百代唱片，唱歐西同國語歌，以忘不了的你走紅，香港好受歡迎。

佢入讀過崇基學院英國文學系，讀咗兩年，太似中學就唔讀。一九六七年入無綫電視，啱啱開臺無耐，就向佢招手。佢本身想做編導，無綫要佢兼做主持。開臺節目星光晚會做主持歌手，潘迪華、潘秀瓊都係常客，關正傑叫新人。曾經去過臺灣登臺同錄唱片。亦有主持山水之歌，節目由山水音響冠名贊助。一九七〇年，唱咗無綫電視首支片集主題曲星河，顧家輝作曲。佢唱厭咗國語歌，皆因啲歌講女人懦弱，等老公返來。之後差唔多完全退居幕後，離開香港電台又去做英國廣播電台，之後又返香港電台，做幕後監製。八十年代已經做到高級總監，製作八十年代面面觀，探討時事。

一九八二年十一月廿三號，年青人周報，就有篇小美訪問佢，講到啲人睇佢做老牌歌手，實情佢出早，好後生。一九八四年節目聽歌學英文首播，佢同詹德隆一齊主持，每集三分鐘，用歌教英文。

屋企

佢祖家做文房四寶，係老字號。

一九七〇年十二月廿六號結婚，老公梁濃剛，當時香港電台同事，亦係樂評人同無綫電視管理層。婚禮喺九龍聖德肋撒堂，伴郎屠用雄，伴娘張敏儀。