謝霆鋒頂包案

謝霆鋒頂包案

當事人謝霆鋒
日期	2002年3月23號－10月16號 (2002-03-23－2002-10-16)
地點	香港
又叫	頂包案
參加嘅人	謝霆鋒 英皇娛樂 成國定 劉國偉
已完結

謝霆鋒頂包案，係指響2002年3月23號藝人謝霆鋒響香港島紅棉路炒車後，搵其他人嚟頂包嘅事件。

經過

2002年3月23號凌晨，一架價值240萬嘅法拉利F360跑車響香港島紅棉路撞向路邊花壇，成架車幾乎變形。事後司機成國定到警署自首。

但係經廉政公署調查之後，查出當晚揸跑車嘅人係謝霆鋒。原來謝霆鋒因為要到外國做節目，所以打電話通知經理人處理，而自己響事發後畀疑似張栢芝嘅人接走。之後經理人搵到英皇娛樂公司專屬司機成國定，叫佢做替死鬼。響廉署介入調查後，好快就拉咗謝霆鋒，據傳地點就響張栢芝屋企。

6月6號，律政司認為案件證據足夠，正式起訴謝霆鋒、成國定同差人劉國偉。9月20號，謝霆鋒頂包案響西區裁判法院開庭審理。謝霆鋒一方請嚟大律師鍾偉強、清洪嚟為自己辯護。

判決

10月2號，法院認為謝霆鋒響事發之後未有執好手尾就離開現場，已經係妨礙司法公正，裁定謝霆鋒罪名成立，判謝霆鋒還押壁屋監獄14日後再做判決，最終佢畀人判240個鐘社會服務令；「替死鬼」成國定就響認罪同埋出任污點證人之下，被判坐監四個月；而被指任由頂包案發生、罪名係串謀妨礙司法公正嘅差人劉國偉就被判坐監六個月。律政司認為判決太輕申請司法覆核，但畀裁判官駁回。

謝霆鋒同劉國偉唔滿意判決，以污點證人成國定曾經推翻口供為理由，申請上訴。2003年11月28號，終審法院駁回謝霆鋒嘅上訴，謝霆鋒響庭後表示「無期望，無失望」。2004年10月7號，終審法院判劉國偉上訴得直，劉國偉畀法院改判無罪。

影響

響頂包案入面，成國定同劉國偉都要坐監，但身為當事人嘅謝霆鋒就判得最輕，淨係240個鐘社會服務令，引起市民嘩然。而謝霆鋒畀香港學生選做2002年「最負面人物」同埋「風雲人物之首」，形象插水。受事件影響，謝霆鋒被迫潛水一段時間，響2003年復出之後更加將事業重心由香港轉去中國大陸。當時英皇娛樂嘅收入有56%係嚟自謝霆鋒，呢次事件亦令英皇娛樂損失慘重。