變星

造父變星

變星，恆星一種，地球望上去，有時光啲，有時暗啲，光等會變，因此又叫變光星。呢處變，並唔包地球大氣擾動而變。

光變，有出自內在，恆星本身變光變暗，有脈衝變星，出自周期脹縮，有爆發變星，恆星末期爆發，呢類叫內因變星。又有出自外在，恆星畀其他嘢遮住，有食變星，出自雙星多星公轉，呢類叫外因變星。有啲有週期，有啲就突變。

一般情況，恆星唔多唔少，本身都會變光，好似太陽咁，十一年週期，有千分之一變化。太微細就唔當成變星。

古人對星光變化，視為占卜一類，甚至影響國運。雖則好多只受大氣影響，然而亦有相當變星記錄。新星、超新星呢類爆發有時好明顯，突然見到有星好光。而食變星，古埃及就有記大陵五，實情佢有三星，有光有暗，公轉間中會暗掩光。