趙盾
| 趙盾 | |
|---|---|
| 姓名原文 | 趙盾 |
| 出生日 | 656年 BC  |
| 死亡日 | 597年 BC （表達錯: 未預料嘅 < 運算符歲） |
| 國籍 | 晉國 |
| 母語 | 中文 |
| 識嘅語言 | 中文 |
| 職業 | 政治人 |
| 仔女 | Viscount Zhuang of Zhao |
| 阿爸 | Viscount Cheng of Zhao |
| 阿媽 | Q16603348 |
| 兄弟姊妹 | Q15902800、Q3271841、Zhao Yingqi |
[改維基數據] | |
趙盾（前655年—前601年），諡號「宣」，又叫做趙宣子、趙孟、宣孟，嬴姓趙氏（秦朝之前，古人既姓氏係分開既，佢本姓嬴，因為祖先俾周穆王封咗去趙城，所以用封地趙城做氏），佢老豆係趙衰，佢係趙同、趙括、趙嬰齊既哥哥。趙盾係春秋時代晉國既卿大夫、權臣，執掌軍政大權。
生平[編輯]
公元前656年（周惠王21年），因為「驪姬之亂」（晉獻公既妃子驪姬害死咗太子申生，迫走重耳、夷吾，然後立咗佢個仔奚齊做儲君），重耳逃亡去北狄既翟國，負責侍奉公子重耳既趙衰跟住去，逃亡北狄既19年間，佢娶咗北狄既女仔叔隗做老婆，生咗趙盾。
公元前621年（周襄王31年）8月，晉襄公死咗，當時趙盾執掌晉國既軍政大權，佢依照晉襄公既遺命立咗晉襄公既仔夷皋做國君。因為夷皋太年幼，所以當時既其他晉國官員都希望立年紀比較大既做國君。其實趙盾原本係想立住喺秦國既公子雍（晉文公同杜祁既仔），但係狐射姑（晉文公既表弟）傾向支持公子樂（晉文公同辰嬴既仔）。趙盾認為公子樂既阿媽地位卑賤，又侍奉過兩個國君，係一個淫婦，所以立公子樂做國君會唔夠威望，又無大國既庇護，毫無出息，係「母淫子辟」；相反，公子雍就「母義子愛」，公子雍既阿媽杜祁，為人謙讓，公子雍又喺秦國做過官（亞卿；周制既卿分三級，上卿、中卿、下卿；中卿又叫亞卿），而秦國強大，離我哋又近，需要既時候可以成為佢既外援，容易樹立崇高既威信，立佢做將會比較適合。晉襄公既夫人穆嬴每日都抱住太子喺朝廷上哭訴話太子無做錯任何事，唔應該無得繼位；去趙盾屋企向叩頭，又以「先君之命」做理由，軟硬兼施，趙盾同一眾大夫都怕咗穆嬴，所以放棄咗立公子雍，改立太子夷皋做國君（晉靈公）[1][2][3]。
晉襄公死咗之後，因為晉靈公太細，所以軍政大權都落咗喺輔臣趙盾嗰度，開啟咗晉國卿大夫專權既先河。趙盾喺公元前621年（周匡王元年）8月，代表年幼既晉靈公，同齊昭公、宋成公、魯文公、衞成公、陳共公、鄭穆公、許僖公、曹共公會盟，開咗臣子參加諸侯會盟既先河，亦係春秋時代臣子坐大，諸侯地位下降既開始。
公元前619年（周襄王33年；魯文公8年）10月，趙盾同魯文公喺衡雍訂立盟約。
公元前615年（周公頃王4年），秦康公攻打晉國，趙盾率晉軍同秦軍喺河曲打仗。晉國大夫臾駢認為秦軍既糧食唔夠，唔能夠打持久戰，建議堅守待戰。秦國大夫士會睇穿臾駢既計謀，亦知道趙穿（趙盾既堂弟；晉襄公既女婿），既狂妄又唔識軍事，而且對臾駢唔服氣，所以叫秦兵襲擊晉國既軍營，引誘趙穿出擊。趙穿中咗計，孤軍出擊；趙盾因為驚趙穿俾秦國俘虜咗，全力出戰，接應趙穿；之後秦軍退咗兵。
公元前613年（周公頃王六年），趙盾同宋、陳、衞、鄭、許、曹六國既國君喺宋國既新城結盟。
公元前608年，楚國、鄭國攻打陳國、宋國，趙盾率領軍隊救援，佢同宋國、陳國、衛國、曹國等諸侯國既軍隊喺棐林會師，一齊進攻鄭國。
晉靈公荒淫無道，趙盾好幾次直言進諫。到咗公元前607年，晉靈公終於頂唔順，想殺咗趙盾，於是派咗鉏麑去行刺趙盾。因為趙盾出咗名係忠於國君，對晉國好重要，鉏麑唔忍心落手，自殺死咗。同年九月，晉靈公請趙盾飲酒，安排咗殺手埋伏喺殿堂，準備殺死趙盾。提彌明發現咗，急步走上殿堂，然後話：「臣下侍奉國君飲酒，超過三杯，就唔合禮㗎喇！」跟手扶咗趙盾落殿堂。晉靈公放狗追佢哋，提彌明上前同隻狗搏鬥，將隻狗殺死。趙盾話：「唔用人而用狗，雖然兇猛，又有乜嘢用呢！？」趙盾一邊搏鬥，一邊退出去，不過提彌明俾伏兵殺死咗；趙盾就逃出咗晉國既都城。趙盾逃亡緊既時候，喺9月26號，趙穿喺桃園殺死咗晉靈公。當時趙盾仲未走出晉國既國境，佢聽到晉靈公既死訊，就即刻折返。晉國既太史董狐喺史書上記錄話：「趙盾弒其君夷皋」，意思係「趙盾殺死咗佢既老細」，同時喺朝廷公布咗呢個睇法。趙盾解釋話：「老細唔係我殺既」。董狐回應話：「子為正卿，入諫不聽。出亡不遠，君弒，反不討賊，則志同。志同則書重，非子而誰？故書之曰『晉趙盾弒其君夷皋』」[4]，意思係「你身為正卿，逃亡既時候又無離開國境，返嚟又無討伐逆賊，殺死國君既人，除咗你，仲可以係邊個？」趙盾話：「烏呼，我之懷矣，自詒伊戚，其我之謂矣」[5][4]，意思係「唉！《詩經》話既『因為我既留戀，俾自己帶嚟咁大既憂傷』，講既大概就係我喇。」孔子話：「董狐，古之良史也，書法不隱。趙宣子，古之良大夫也，為法受惡。惜也，越竟免。」，意思係「董狐係古代既好史官，跟據事實，直言書寫，毫無隱諱。趙盾係古代既好大夫，因為史官既原則而蒙受殺死老細既罪行。實在可惜啊！如果佢逃亡既時候，走出國境，就唔會有咁既污名啦！」
公元前601年，趙盾病逝。
| 前任： 狐射姑 |
春秋晉國正卿 前621年—前601年 |
繼任： 郤缺 |
| 前任： 趙衰 |
晉國趙氏宗主 前622年—前601年 |
繼任： 趙括 |
參考[編輯]
- 趙穿
- 趙氏孤兒
影視作品[編輯]
電影[編輯]
| 年份 | 名稱 | 主演 | 語言 |
|---|---|---|---|
| 2010 | 趙氏孤兒 | 鮑國安 | 國語 |
電視劇[編輯]
| 年份 | 名稱 | 主演 | 語言 |
|---|---|---|---|
| 1999 | 莊姬公主 | 王文治 | 國語 |
| 2019 | 忠孝節義之萬古流芳 | 羅育忠 | 閩南話 |
參考[編輯]
- ↑ 《左傳·文公七年》：穆贏日抱大子以啼於朝，曰：「先君何罪？其嗣亦何罪？舍適嗣不立而外求君，將焉置此？」出朝，則抱以適趙氏，頓首於宣子曰：「先君奉此子也而屬諸子，曰：『此子也才，吾受子之賜；不才，吾唯子之怨。』今君雖終，言猶在耳，而棄之，若何？」宣子與諸大夫皆患穆嬴，且畏逼，乃背先蔑而立靈公，以御秦師。箕鄭居守。趙盾將中軍，先克佐之。荀林父佐上軍。先蔑將下軍，先都佐之。步招御戎，戎津為右。及堇陰，宣子曰：「我若受秦，秦則賓也；不受，寇也。既不受矣，而復緩師，秦將生心。先人有奪人之心，軍之善謀也。逐寇如追逃，軍之善政也。」訓卒利兵，秣馬蓐食，潛師夜起。戊子，敗秦師於令狐，至於刳首。己丑，先蔑奔秦。士會從之。
- ↑ 《史記·晉世家》：太子母繆嬴日夜抱太子以號泣於朝，曰：「先君何罪？其嗣亦何罪？舍適而外求君，將安置此？」出朝，則抱以適趙盾所，頓首曰：「先君奉此子而屬之子，曰『此子材，吾受其賜；不材，吾怨子』。今君卒，言猶在耳而棄之，若何？」趙盾與諸大夫皆患繆嬴，且畏誅，乃背所迎而立太子夷皋，是為靈公。發兵以距秦送公子雍者。趙盾為將，往擊秦，敗之令狐。先蔑、隨會亡奔秦。
- ↑ 《史記·趙世家》：太子母日夜啼泣，頓首謂趙盾曰：「先君何罪，釋其適子而更求君？」趙盾患之，恐其宗與大夫襲誅之，乃遂立太子，是為靈公，發兵距所迎襄公弟於秦者。
- ↑ 4.0 4.1 《《左傳·宣公二年》》.
- ↑ 《詩經·小雅·小明》：「心之憂矣，自詒伊戚」