足球球證
.jpg)
.jpg)
.jpg)
足球球證係足球比賽入面負責執行球例以維持球賽公平嘅人，職責係判決入球、罰球、越位、界外球、角球等[1]。一場正式足球比賽嘅球證通常包括：一個主球證、兩個旁證、一個第四球證，部份比賽有另外兩個底線球證，亦可以有視像助理球證。
主球證
[編輯]主球證擁有最大嘅權力，並可以懲罰球員同推翻旁證嘅判決。主球證會喺場入面近距離跟住個波或者控球嘅球員而走動，睇實佢哋有冇犯規，佢身上會配有一支哨子，用嚟吹響示意比賽開始或結束，吹罰犯規、個波出界或示意換人等等；另外佢身上會袋住一張黃牌同埋一張紅牌，黃牌係用嚟警告犯規嘅球員，表示如果球員再攞黃牌就要趕出場，而紅牌就係畀啲嚴重犯規嘅球員，將佢即刻趕出球場。球證喺進入球場之後直至比賽結束，有權警告同埋將球員驅逐離場，包括喺中場休息嘅時候、加時比賽嗰陣同埋互射十二碼嘅時候。
旁證
[編輯]旁證負責判決越位、界外球、角球等，並協助主球證執法，兩位旁證唔會企入球場入面，而只會分別企喺兩方區域嘅邊線上下游走。佢哋嘅手上會拎住一支旗（多數係黃紅色格仔旗），用嚟傳遞重要訊息畀場內主球證，有時主球證睇唔到一啲球員嘅犯規動作，就會同最接近嘅旁證了解事件，跟住先決定判唔判罰。
第四球證
[編輯]第四球證係負責場邊換人，檢查吓出場嘅球員身上嘅配備有冇問題，舉燈牌示意換人嘅號碼，而當球賽到咗中場前或者完場前，亦會根據主球證畀嘅訊號而用燈牌示意嗰場波會補幾多分鐘比賽時間。當主球證或者旁證因為受傷而唔能夠繼續執行職務嗰陣，第四球證就會上場頂替佢哋。
底線球證
[編輯]部份比賽會有另外兩個底線球證，主要職責係協助主球證決定喺禁區裏面發生嘅事，同埋個波係唔係已經過咗龍門白界。不過自從有視像助理球證之後，已經冇再用底線球證。
視像助理球證
[編輯]視像助理球證係透過視像即時重播同通訊系統協助主球證執法嘅裁判員，當遇到有爭議性問題，球證可以要求睇重播。目前VAR並唔係強制性，各地比賽可以自己決定用唔用。
參考
[編輯]- ↑ 〈足球嘅規則-球證〉。原著喺2016年3月6號歸檔。喺2015年11月24號搵到。