農場餐廳
農場餐廳係陳興濤創辦嘅港式西餐廳，1987年第一間分店喺中環威靈頓街，餐廳供應經過改良嘅簡單西餐，標榜所有食物唔落味精、雞精、牛肉精。全盛時期曾經有48間分店，僱員人數達到1,300人。1997年亞洲金融風暴爆發嘅時候全線結業。
經營特色
[編輯]農場餐廳有一套特別嘅經營管理策略。陳興濤唔准員工講粗口，亦唔准員工喺廚房食煙。餐廳嘅營業時間比一般餐廳短，噉樣令到員工有更多休息同與屋企人相處嘅時間。主管級員工亦要撰寫工作日記，並喺員工之間傳閱。陳興濤亦多次撰寫文章，表述公司嘅經營方向同面對嘅問題，更曾經將撰寫嘅文章刊登喺報紙廣告度。而農場餐廳各分店嘅牆上、餐牌同餐墊紙上，都印有陳興濤撰寫嘅關於人生哲理等文章。
重開餐廳
[編輯]2008年開始，用過「農家意粉」呢個名先後開設咗五間分店，但係因為經營問題導致入不敷支，2015年1月已經全部執笠。2015年7月，再喺深水埗九江街開設「農家意粉農家妹」餐廳，2021年改返名做「農場餐廳」。
2020年5月曾經喺長洲再用「農場餐廳」呢個名重開，不過只係開咗幾個月，9月就執咗。之後再喺深水埗南昌街開，舖頭冇裝修，設備簡陋，招牌只係用膠紙黐住一塊橫額，顧客要坐喺啲貨物隔籬食嘢[1]。