農田水利法

農田水利法係宋神宗喺熙寧二年（1069年）頒佈嘅鼓勵農業發展政策，亦都係王安石主持嘅新變法工作入面其中一項法令。

北宋時期，因土地兼併同埋賦役不均，令到水利工程嚴重失修，農田好多荒廢，所以喺1067年宋神宗即位，同埋王安石執政之後，喺公元1069年（熙寧二年）頒布咗農田水利法，派官專責管理。農田水利法嘅目的係鼓勵農民修建水利工程、開墾荒廢咗嘅土地，同埋多啲耕種嘅措施。

修建水利工程嘅材料由當地居民按戶分派。如果係靠民力起唔到嘅，工程費唔夠嘅可以問政府借，利息一分；如果單一州縣負擔唔起，可以夾埋幾個州縣一齊負責。如果有官員或者平民提出到有利土地種植嘅方法，或者指出水利設施（例如堤堰）嘅問題同有效嘅改善方案，都可以論功封賞。

呢條法令喺頒佈之後嘅七年內，根據《宋會要輯稿》既記載，全個北宋興修水利工程達到17,093項，收益民田多達36,177,888畝。