逃出武漢

《逃出武漢》係一首2020年2月1號由高登音樂台推出、關於武漢肺炎大爆發嘅歌，改編自黃明志、王力宏嘅《漂向北方》，係高登音樂台少有以普通話唱嘅改詞歌曲。

另外，高登音樂台亦乘機喺推出呢首歌嘅時候，呼籲香港對中國大陸封關。

歌曲內容

首歌內容主要反映喺武漢肺炎期間，居民因為武漢封城而相繼逃亡嘅恐慌。另外，歌詞亦提到武漢華南海鮮批發市場入面有唔同嘅動物而當地人乜都食，同埋中國中央政府最初講到好安全無問題，瞌埋眼唔重視情況，仲話啲人喺度散播流言，但其後終於搞到大爆發，好多人冇命。

反應

網絡名人司徒夾帶喺社交媒體形容呢首歌好聽到想用Hifi聽，想down落player聽。另外，原創人黃明志亦喺社交媒體嗰度分享咗呢首歌嘅改版，話希望可以多啲人聽到呢首歌。