進奏院
進奏院（粵拼：zeon3 zau3 jyun2），係由唐朝開始有嘅藩鎮駐京機構，駐紮喺京城長安（依家嘅陝西省西安市）。機構入邊主要係啲進奏官（粵拼：zeon3 zau3 gun1），主要職務係報遞章奏同承轉詔令[1]。名義話係藩鎮同中央間嘅聯絡機搆，實際就係藩鎮蒐集中央同其他地方啲資訊嘅情報機構[2]。
名[編輯]
原機構係叫作「上都邸務」（粵拼：soeng6 dou1 dai2 mou6）、「留後使」，係指藩鎮派駐到長安嘅代表，而喺大曆十二年（777年）五月俾人改名成「上都進奏院官」 [3] 。改名後啲一般人，仲係照舊將進奏院叫做「邸」或「留後院」，而將啲進奏官叫作「邸吏」（粵拼：dai2 lei6）[4]。
沿革[編輯]
大曆十二年（777年）改成上都進奏院後，係作為各州藩鎮官員在京嘅寓所[5] ，多數起喺東市周邊嘅崇仁坊同平康坊[6]。進奏院度設有進奏官，任務係向朝廷報告所屬鎮嘅情況，所以會有邸報，使費係由地方承擔返。到宋初延續返唐制，亦設咗進奏院，置進奏官。
喺宋太宗太平興國六年（981年），當局設立咗都進奏院，強化咗對各州府進奏官嘅控制，係以京朝官監領。到南宋就轉屬咗門下省給事中，蒙元時代終結咗呢個體制[1]。
運作[編輯]
唐朝啲進奏院係集中喺長安城東市週邊嘅幾個坊，其中係最多喺最繁華嘅崇仁坊同平康坊。據收尾學者嘅研究，隨著大明宮同興慶宮嘅落成，嗰陣時以東市為中心喺朱雀街東，係形成埋貴族同官僚嘅集中居住區。咁一嚟呢一帶喺唐後期，就成咗長安城各種情報嘅集中地，所以啲進奏院都揀埋喺度駐紮，啲進奏官日常就方便去刮料兼同權貴們打同通[7]。
行政[編輯]
進奏官都係由藩鎮委派嘅，唔隸屬中央。不過御史臺就有設一個台巡驅使官，進奏官照規例喺公務上係應向佢通報，定時每日到御史臺度「承應公事」[8]。
日常活動[編輯]
進奏院嘅任務唔係得接待、傳達、溝通幾樣。喺唐朝進奏院最多嘅時候有成四五十個，係有大班嘅屬員常駐，仲會置埋屋，包埋二奶，收埋啲女眷，流連啲煙花柳巷，做埋啲生意。最早嘅匯票——飛錢，就係呢段時期啲進奏院搞嘅，係方便返自己地頭嘅商人到京城交易而開展嘅業務：
商人到埠做完生意後，就去自己地方派駐嘅進奏院度，存入自己手頭得到嘅啲金屬幣收入。進奏院就會開返聯單式嘅文牒或公據，載明交錢人嘅名堂、入數嘅數額，仲有預攞錢嘅機搆名同地點，一聯交返到商人手，一聯會寄返所轄嘅地方本部[9]。商人以一紙憑據即可隨時隨地兌換現錢[10]。等商人走嘅時候亦可以再憑證兌換返啲現錢。史稱：「以輕裝趨四方，合券乃取之，號『飛錢』。」[8]。
而進奏院嘅一項主要任務就係為啲藩鎮蒐集返啲情報，自己仲有埋一套通訊系統，不過主要仲係利用返官驛嘅設備[11] 。時人係話進奏院「能傳萬里之音，不墜九霄之命」，呢種情況令到啲節度使，有時喺朝命未正式下達前，早就知道嗮公文啲內容。進奏院搞情報任務，主要會有下底嘅幾樣[12] ：
- 由公開途徑傳抄朝廷發布嘅「報狀」，製作成「進奏院狀報」 [13]報返俾節度使。呢種報刊係主要嘅收料渠道，幫助返節度使掌握到朝廷嘅政治、經濟、軍事甚至係皇室動向。
- 進奏官自己係會用收買、拉攏等手段，靜雞雞咁刺探情報[14] 。
- 組織啲集團搞暗殺等地下活動，進奏院呢陣時會擔當埋行動指揮嘅據點中心。
紀事[編輯]
進奏院同藩鎮係互助互信嘅關係，經常為藩鎮爭取到最大嘅利益。喺文宗太和七年（833年），朝廷加盧龍節度使楊志誠為檢校吏部尚書，進奏官徐迪抗議話：「軍中不識朝廷之製，唯知尚書改僕射為遷，不知工部改吏部為美，敕使往，恐不得出。」 [15]而遇著地方政權抗命，朝廷都會搵返進奏官開刀，好似喺大和元年（827年）成德節度使王庭湊幫助咗李同捷嘅叛亂，朝廷跟著就落旨話：「其上都進奏院，宜令御史台、京兆府切加守捉，禁其出入，待敕後處分。」 [16]
參考同埋註[編輯]
- ↑ 1.0 1.1 中國歷代職官辭典 賀旭志, 賀世慶. 中國社會出版社, 2003
- ↑ 隋唐間諜機構 互聯網檔案館嘅歸檔，歸檔日期2021年2月20號，. 軍事間諜（上）邢春如，李穆南，竭寶峰，劉心蓮 遼海出版社 2007-09-01 2007-09-01
- ↑ 《唐會要》，卷七八《諸使雜錄上》，1702頁，上海，上海古籍出版莊，2006
- ↑ 唐、宋進奏院比較硏究 北京師範大學歴史學院 李永 新材料、新方法、新視野：中國古代國家和社會變遷：國際研究生學術論壇論文集 2013
- ↑ 《文獻通考·職官十四》：「唐藩鎮皆置邸京師，以大將主之，謂之上都留後。」
- ↑ 宋敏求《長安志》記載：「（崇仁坊）北街當皇城之景風門，與尚書省選院最相近，又與東市相連……因是一街輻輳，遂傾兩市，晝夜喧呼，燈火不絕，京中諸坊，莫之與比。」（《長安志》卷8《崇仁坊》，《叢書集成初編》第3210冊）
- ↑ 中國古代的「駐京辦事處」:進奏官狐假虎威 2010-05-11光明日報
- ↑ 8.0 8.1 古代“驻京办”：唐朝最兴盛 拉动京城消费 2015-03-24 来源：中国新闻网
- ↑ 中國歷代經濟簡史 崧博 大佳網, 2018-01-25
- ↑ 不過入數並唔會全部押運返當地供商人提取。進奏院需要提取部分入數，作為地方政府向朝廷上繳嘅賦稅；地方政府自己就唔使再車過一次啲錢銀入京城。
- ↑ 中国古代驿站与邮传 臧嵘， 商务印书馆，1997-09
- ↑ 第二章 中国古代的间谍（特务）组织 互聯網檔案館嘅歸檔，歸檔日期2021年2月20號，. 尔虞我诈：中国古代四千年谍海风云 赵英著. 北京：中国社会科学出版社，2016.6
- ↑ 又叫做《開元雜報》，新聞史家們認為呢個刊物，就係中國大陸嘅第一份新聞紙。
- ↑ 淄青進奏院就曾向本鎮密報判官高沐「潛通朝廷」。公元930年九月，四川進奏官蘇願打聽到安重誨想發兵進攻西川，馬上向孟知祥報告：「朝廷欲發大兵討西川」。
- ↑ 《資治通鑒》卷二四四
- ↑ 《冊府元龜》卷123《帝王部》