選舉舞弊

選舉舞弊（英文：Electoral Fraud），或者叫選舉操控手法，係指用各種非法或者唔公正嘅途徑妨礙自由選舉，令選舉制度成為「做戲選舉」嘅手段。如果成功操控全國性嘅選舉，將會令民主政治受到腐蝕，甚至引發政變。

舞弊技巧

提名、初選階段

醞釀提名

• 候選人唔係由自薦或者聯署提名，而係由某個權力組織產生。當呢個手法結合咗等額選舉之後，選舉結果幾乎係完全被控制。

操控假民調影響政黨提名候選人

• 唔同陣營嘅支持者，特登唔按投票意願來做表態，噉樣去影響政黨喺提名候選人之前嘅民調，令到勝算唔大嘅候選人取代原本當選率比較高嘅候選人。
• 電話民調，喺做電話民調之前，申請大量嘅固定電話裝機，從而提高可操縱嘅電話民調數量。
• 改變民調條件，例如問唔同嘅問題、喺唔同嘅時間去問、用手機抑或用固定電話，都會造成唔同嘅民調結果。

誤導或者令選民產生混淆嘅選票設計

• 例如非政黨提名嘅候選人，喺選票度嘅政黨欄位註明政黨個名，或者同名同姓嘅候選人出現喺同一張選票。亦有選前特登改咗個名，起個令啲人容易記嘅名。

選戰階段

操縱選民

組織動員嘅非自願投票行為

例如用宗教操控信徒，或者喺傳統型社區進行組織動員，將選票集中到特定嘅候選人。為咗避免唔去投票，會用交通工具車埋成團人去投票站。

操縱虛假嘅戶口遷移影響投票結果

喺地區性嘅選舉，透過戶籍遷移來保證獲取大量選票，同埋集中喺特定嘅選區裡面。但係呢啲選民往往唔係真正住喺戶籍地，佢哋祗係為咗攞到投票資格。

剝奪投票權

• 喺選舉之前，改變選區範圍（通常係縮細選區），或者係修改投票資格，先排除咗啲對佢選情有不利影響嘅羣體。
• 更改選舉日期亦可能改變各族群嘅投票率，例如喺大學的期中考或者期末考嘅時候舉辦選舉，噉樣會降低大學生嘅投票率。如果校方同大學生嘅平均政治立場有大差別嘅話，噉剝奪投票權嘅效應就可能更加嚴重。

誘導選民嘅投票意向

• 操縱棄保。利用耳語散佈，令選民誤以為特定候選人冇當選機會，而自動將選票集中到其他嘅候選人。
• 公佈其他候選人嘅私密行程，或者踢爆其他候選人嘅個人私隱（例如財產、病歷）。
• 用啲虛假政見、永遠唔會實現嘅承諾來呃人。
• 操作民意調查造假，捏造民調數據或者誘導民調。
• 製造暴力事件，產生同情票。

調整投票時間

• 將就職時間差幾個月嘅幾個選舉合埋一齊搞，或者喺公眾假期前後投票；重有啲就刻意安排特定對象喺投票日「返工」、「考試」、「旅遊」，令佢冇辦法參與投票。

恐嚇

• 以暴力脅迫，或者暗示特定候選人如果當選，將會導致打仗，或者經濟惡化增加失業率。
• 企業主同員工講，如果選舉結果唔啱佢心水，噉就出少啲糧、獎金。

買票

内文：買票

• 買票，又叫做賄選。通常係指喺選舉之前，候選人透過組織動員嘅方式，畀現金、提供免費旅遊、或者送啲高價禮品，噉樣來誘導大批選民嘅投票意向。

期約賄選

• 期約賄選同候選人政見之間，有時係好難區分。例如喺選舉嘅時候，候選人提出大興土木工程或者交通建設嘅政見，就有可能係在暗示緊選舉樁腳，當選之後會發包工程畀佢哋去賺。不過喺選舉之後，仍然可以用係咪涉及圖利特定廠商、利益輸送，或者係咪有對價關係來區分。
• 另一種嘅期約賄選係以賭盤方式進行，選舉之前唔會畀任何買票錢，想買票嘅會幫其他人出賭盤嘅投注金，並且聲明如果佢哋投注嘅候選人當選，佢哋就可以分到錢，噉樣來誘導啲人幫手拉票。

抹黑造謠

• 發佈關於特定候選人嘅不實消息，或者寫佢嘅黑材料，令到佢當唔到選。但如果係陳述事實、唔涉及候選人嘅個人私隱、關乎公眾利益之類嘅，就唔屬於造謠或毀謗。

減少競爭對手同暫停選舉

• 勸退，包括用退選補償金之類嘅銀彈攻勢，或者策動候選人嘅親屬。
• 剝奪競爭對手嘅參選資格，例如令佢變做政治犯。
• 謀殺，有啲選舉係規定：如果有候選人重傷或者死亡嘅話，選舉會暫停。

司法系統介入選舉

• 透過唔公正嘅起訴同判決，去混淆選民對特定候選人嘅觀感。
• 拖延一啲陳年舊案，喺選舉前先至落案起訴，叫做「養案」；另一種係重未確認係弊案嘅時候就趕喺選舉之前檢控。
• 對特定候選人實施大規模監聽。

禁止拉票

• 喺選舉投票之前，唔準候選人向選民遊說。拉票係候選人之間嘅競爭表現，有利於選民獲知關於候選人嘅更多信息，從而幫助佢哋做出投票決定。呢樣對於自薦候選人係極為不利。

選舉暗示

• 喺點票結果證實某個候選人成功連任或者確定當選之前，已經當佢係勝選者噉為佢做工作安排或者計劃。

投票、開票階段

做票

内文：做票

• 喺投票同開票嘅過程中，利用不正當手段令特定候選人嘅得票多咗或者少咗，進而改變投票結果。如果祗係改變少數選票，或者喺鐵票區做手腳嘅話，做票係好容易執行嘅。

預防對策

不記名投票

内文：不記名投票

• 投票者喺投票嘅時候，選票上面唔使寫落自己個名字或者身份識別，避免喺非自願嘅情況下畀人知自己嘅投票意向。

可供查證嘅選務流程

• 選舉前嘅選舉人名冊造冊，按戶籍同人數來發放記有選舉人姓名嘅選舉通知單。
• 選舉嗰陣，憑選舉通知單、身份證同私章領取選票，並用私章喺選舉人名冊度抌印，作為領咗選票嘅證明，並回收選舉通知單。
• 選舉之後，總投票數等於有效票同廢票嘅總數，亦等於選舉人名冊上面實領選票嘅總數，也等於實際回收嘅選舉通知單嘅總數。

睇埋

• 貪污