空姐牛肉飯
(由郭德英跳轉過嚟)
空姐牛肉飯，正式名神戶食堂[1]（英文：Kobe Dining），曾經係香港一間日式食肆，因為佢嘅「藍店」身份而出名。舖頭喺九龍深水埗欽州街37K號西九龍中心8樓嘅美食廣場入面。
老闆係前空姐郭德英（Annie，1972年12月4號–）喺2016年創辦，招牌菜係日式牛肉飯，皆因佢響1995年至2010年間，做過十幾年美國聯合航空空姐，所以就用「空姐牛肉飯」個名做噱頭[1]。
2023年4月，郭德英話想專注旅行社業務，喺4月26號摺埋間食肆。佢強調呢次係「光榮結業」，原本一早想執咗佢，但唔想畀黃絲睇死，所以一直堅持，但後來佢終於諗通，認為「自己嘅歷史任務已經完咗」，可以放手專注喺旅行社業務。[2]
政治立場同事件
[編輯]佢本身係親中派支持者，2019年反修例運動爆發後，郭德英因為多次發表撐警言論，令空姐牛肉飯畀反修例運動支持者抵制，做咗其中一間出名嘅「藍店」。
控告梁家榮被拒
[編輯]2020年佢又以香港電台節目有反警內容誤導市民做理由，搵咗有大律師資格嘅新民黨立法會議員容海恩，用私人傳票方式告廣播處長梁家榮「公職人員行為失當」，結果法庭認為表證唔成立，拒絕受理[3]。
同劉佩玉違反新型冠狀病毒限聚令、叫記者收工
[編輯]喺2020年12月，佢同親中派區議員劉佩玉合作進行地區工作，但期間人數聚集過多違反當時嘅新型冠狀病毒限聚令，本來保安只係提點佢哋，但佢哋都唔理，結果引嚟警員到現場調查。之後記者追問佢有關事件嘅時候，佢亦拒絕回應，又賴記者人多，先至出現問題，叫佢哋收工[4]。
睇埋
[編輯]參考
[編輯]- ↑ 1.0 1.1 空姐賣牛丼 惹來「得意」經歷？
- ↑ 藍店空姐牛肉飯宣布4.26「光榮結業」 老闆娘郭德英轉行做旅行社：仲開心過黃絲
- ↑ 空姐牛肉飯老闆提私人檢控告梁家榮 裁判官拒批申請
- ↑ 〈民建聯劉佩玉孖「空姐牛肉飯」派禮物包 人數過多違限聚 警到場調查 | 獨媒報導〉。《獨立媒體》。2020-12-22。喺2022-01-16搵到。