郭政彤

郭政彤（Santino），香港親中派人士，曾經因為喺無綫電視節目《盛女愛作戰》入面擔任「兩性導師」而得到一啲公眾嘅關注，近年就變身成為親中派嘅網絡紅人。

早年生涯

佢曾經留學澳洲。

經歷同爭議

個人感情生活說法前後不一

喺無綫電視節目《盛女愛作戰》播出期間，佢曾經被揭過去嘅荒唐生活，然後佢回應嘅時候，又聲稱有50個親密女友，曾經同時「腳踏五船」，引起社會唔少迴響。另外，佢喺節目入面提出嘅「45度角」理論亦被其他心理專家指出毫無科學依據。之後，佢又被揭發早兩年參加無綫節目《十分試愛》入面，以「怕醜仔」自居，從事辦公室行政工作，報稱拍拖兩次就俾人飛兩次，之後反而變身兩性專家，說法前後唔一樣，令網友質疑。

投身親中派陣營

之後，佢投身親中派陣營，同其他親中派人士開設YouTube頻道新潮民，又曾經同其他激進親中派人士一齊參與一啲遊行。例如，喺美國駐港澳總領事史墨客批評北京未經諮詢港人修改香港選舉制度嘅決定之後，佢就曾經同高松傑、曾榮輝等激進親中派人士一齊去美國駐港總領事館抗議。