都市病

出自維基百科,自由嘅百科全書

都市病(又叫文明病,俗稱富貴病)係一堆疾病嘅通稱,喺國家變得更加工業化同埋人類變得更加長壽嗰陣,呢啲疾病就會更加常見,包括阿茲海默病動脈硬化腫瘤肝硬化呢啲慢性肝病、慢性阻塞性肺病2型糖尿病心臟病慢性腎衰竭腎炎骨質疏鬆症中風肥胖症等等。都市病嘅現象發生喺高度發展嘅國家或城市入面。

起因[編輯]

飲食生活型態同埋環境等等嘅因素,都被視為係影響上述疾病發生率嘅重大原因。食煙酗酒吸毒同埋缺乏運動都會增加後半世罹患某啲疾病嘅風險。

國際上癌症發生率嘅變化[編輯]

一份喺《刺針》發表嘅研究報告講到癌症發生率嘅變化,並且證明咗都市病係存在嘅。佢指出喺好多西方國家,啲人喺二十世紀中葉持續噉進食多咗肉類、乳製品、植物油、果汁同酒,但係麵包、薯仔、米同粟米粉等等嘅五穀就食得越嚟越少。其他生活型態嘅改變,比較明顯嘅有運動量減少,同埋多咗人太過肥。報告指出:「要注意,喺1970年代西方國家嘅人民,大量食用高動物食品、脂肪同糖,同時,直腸、乳房、前列腺、子宮頸同肺部癌症發生率都好高;相對嚟講,發展中國家嘅人民食用至少一種至兩種五穀,而動物食品、脂肪同糖就食得少,而佢哋嘅癌症發生率亦比較低。」報告認為,呢種觀察推斷出啲人嘅飲食習慣(或者生活型態)唔同咗,可能會影響佢哋罹患癌症嘅機率。[1]

美國嘅死亡統計[編輯]

1900年,美國三大死因分別係肺炎/流行性感冒肺結核腹瀉/腸炎。傳染病佔死因嘅百分之六十。當時,心臟病腫瘤分別排第四同第八。到咗1940年代,美國主要死因變成心臟病、腫瘤同其他退化病。到1990年代後期,退化病已經佔所有死因嘅百分之六十。

1900年,死因前三名都係傳染病。到1940年代,主要死因變成咗完全唔同種類的疾病——都市病。[2]

參考[編輯]

  1. Key TJ, Allen NE, Spencer EA. The effect of diet on risk of cancer. Lancet. 2002 Sep 14;360(9336):861-8. Review. PMID 12243933
  2. National Center for Health Statistics, National Office of Vital Statistics, 1947 for the year 1900 (page 67), for the year 1938 (page 55).