鄭裕彤家族

鄭裕彤家族係香港嘅大家族之一，祖籍順德，活躍商界同政界，生意涉足多個範疇。

家族史

家族奠基人鄭裕彤嘅老豆鄭敬詒係廣州嘅綢緞商人，同做金舖生意嘅周至元係同鄉兼老友。鄭裕彤喺二戰嗰陣走佬去澳門，投靠周至元，兼且喺佢嘅周大福金行度打工。由於鄭裕彤聰明勤力，佢好快就升職，重娶咗周至元個女周翠英做老婆，之後喺1956年，周大福正式由鄭裕彤接手。

喺鄭裕彤接手之後，佢首創千足純金，當時呢樣係蝕本生意，但係鄭裕彤認為噉樣可以當做宣傳，畀人知道周大福嘅金係真材實料，後來證明鄭氏當時嘅決定係啱嘅，好多金行都轉而同周大福攞貨。第二樣重大嘅創新就係佢去買咗鑽石牌照，打破當時嘅壟斷。喺鄭裕彤未攞到De Beers鑽石牌照之前，全香港只有廖桂昌一個可以引入鑽石，鄭裕彤於是去南非買咗一啲有De Beers鑽石牌照嘅公司，打破壟斷。

之後鄭裕彤開始向其他生意範疇埋手，好似地產同賭業。地產方面，佢喺50-60年代已經同其他公司合作，例如協興建築，又或者同行嘅景福珠寶。到1974年，鄭裕彤同冼為堅、楊志雲、何善衡等人創立新世界發展，此後成為咗鄭裕彤發展地產嘅旗艦。賭業方面，1970年代，葉漢試過拉攏鄭裕彤一齊投賭牌，後來何鴻燊知道之後，成功分化兩人，令到葉漢投唔成賭牌。鄭氏同何氏之後重齊齊去外地開賭。到1982年，葉漢為咗自己嘅賽馬車會生意，將澳門旅遊娛樂公司將近10%股權用3億港紙賣畀鄭裕彤，兼且一路揸到今日；另外鄭裕彤閒時都鍾意鋤大弟，成日會同其他富豪一齊玩。

1989年，鄭裕彤開始將公司生意慢慢交畀大仔鄭家純，但係鄭家純喺任內頻頻「東征西討」，喺市場買落一大批資產，令到公司負債急升，結果老豆要出山賣資產解圍，不過呢個時期亦都係新世界開始發展唔同產業嘅時期，商業王國開始拓展到其他行業。

1998年，新世界聯同英國嘅第一巴士公司成立新世界第一巴士（新巴），投到本身屬於中巴嘅巴士路線，正式涉足公共運輸。

2011年，鄭裕彤將原本係私人公司嘅周大福上市，當時佢更加話係「圓咗一個心願」。冇幾耐，鄭裕彤喺2012年3月中風，之後一直昏迷，住喺養和醫院，到2016年過身，公司業務就交畀鄭家純同埋第三代接班。

2017年1月，鄭家純中風，之後第三代好似鄭志剛、鄭志雯接掌新世界。