醫療假資訊

醫療假資訊（Health misinformation）係指一啲同醫療相關嘅不實資訊。

特點

佢哋有時會誇大一般常規治療嘅副作用，或者鼓吹就算及早發現都冇用嘅說法。

後果

醫療假資訊帶來嘅後果，包括延誤病人治療，造成公共衞生危機，消耗更多嘅公共資源，亦令一啲本來可以用預防疫苗處理嘅病症變得更加棘手。

著名案例

日本醫生近藤誠癌症治療無用論

日本醫生近藤誠主張癌症去到確診嘅時候，化療只係毒害自身同埋嘥錢。有好多網上關於癌症嘅醫療假資訊，同埋關於醫療假資訊學術研究都提到近藤誠。日本醫學界初期採取無視嘅做法，令佢嘅言論影響越來越多人，久而久之亦有人開始反駁佢。

中國醫生楊永信鼓吹電休克治療醫治上網成癮

中國醫生楊永信曾經鼓吹用電休克治療去醫上網成癮，而且期間唔使用任何肌肉放鬆或者麻醉藥。佢當時一度得到好多中國官方媒體嘅吹捧，形容佢係對抗互聯網上癮嘅英雄。但佢嘅做法，後嚟被發現會引起好多心理問題。除咗楊永信自己發佈無根據嘅醫療假資訊之外，亦有學者認為中國官方媒體嘅吹捧，亦有份造成有關醫療假資訊嘅傳播。

武漢肺炎疫情期間蔣麗芸提議『蒸口罩』消毒捱轟

香港親中派立法會議員蔣麗芸喺2020年1月29號喺個人Facebook專頁貼咗一條嚟自廣州廣播電視台《G4出動》嘅片段，提議市民可以蒸口罩消毒。但佢呢個建議，引嚟港大感染及傳染病中心總監何栢良炮轟，話影片係假新聞，內容大錯特錯兼害死人。何又舉例話，喺2003年沙士爆發期間，就有醫護人員因為重覆使用口罩而受到感染。中大呼吸系統科講座教授許樹昌亦都話，蒸口罩或紫外光消毒嘅方式並唔可行，又強調外科口罩用咗幾個鐘就要棄置，高溫消毒反而會破壞口罩嘅三層結構。除咗醫護人員嘅批評之外，藝人關淑怡亦喺2020年2月1號喺社交網站諷刺政府，指責政府喺疫情持續，確診病例不斷上升嘅情況下仍然拒絕封關，無視市民生命安全，又批評蔣蒸口罩消毒嘅建議冇常識。另外，亦有網民實測一次蒸口罩消毒，結果將口罩幾乎蒸融，引起大批網民討論。