重慶主城區

重慶主城區街景

 重慶主城區（粵拼：cung4 hing3 zyu2 sing4 keoi1） ，亦叫主城九區（zyu2 sing4 gau2 keoi1），指家陣重慶市中心嘅九個市轄區，包括主城六區（渝中區、九龍坡區、江北區、沙坪壩區、南岸區同大渡口區）同近郊嘅三個區（渝北區、北碚區同巴南區），亦即係1933年重慶成為直轄市嗰時嘅範圍。主城區係重慶市入邊城市化率最高、經濟最發達、城市基礎建設最完善嘅核心區域；喺規劃、建設、經濟統計方面，「重慶主城區」爾個講法亦成日有提到。

區劃沿革

民國後期到1954年直轄市時期，重慶全市範圍包括市區六區（市中區、江北區、南岸區、九龍坡區、沙磁區、大渡口區）同近郊三區縣（巴縣、江北縣、北碚市）。後嚟，重慶嘅行政區劃有調整。1950年4月，重慶市人民政府將沙磁區併入重慶市第三區；1955年10月24號改名叫「沙坪壩區」。1954年之後，西南大區行署撤銷，北碚市併入重慶，成咗「北碚區」。1991年，市中區改名叫「渝中區」。1994年，巴縣改名叫「巴南區」，縣北邊七公里街道一部份成咗城區；同年，江北縣改名「渝北區」，城區主要喺南邊新牌坊嗰頭。