金毛尋回犬
金毛尋回犬（Golden Retriever），或者金毛（Golden 或 Goldie），係比較受歡迎嘅狗種。用來搵水禽獵物返嚟（「尋回」嘅意思）。今時今日，金毛係最常見嘅家犬之一，因為容易養，好馴並且對主人要求唔多，只要定期運動，餵食同見獸醫檢查就可以。金毛嘅獨特之處在於得人鍾意嘅性格，同人以及其他狗都可以相處得好好。驚嗰陣會呱呱叫，金毛睇門口唔掂，因為太友善啦。容易訓練，因為天生鍾意討好主人，鍾意同人一齊，有人響度嘅時候會好開心，唔會忔人憎。
外形
[編輯]
金毛尋回犬係一種大型狗種[1]，外形同拉布拉多尋回犬相似，後生嗰陣最似，而淺色嘅金毛更似。最明顯區別係金黃色嘅長毛。毛色喺淺金色到深黃色之間。美國狗舍俱樂部（American Kennel Club, AKC）標準規定金毛嘅毛皮係「豐富、有光澤、唔同層次嘅金色」（rich, lustrous golden of various shades），太淺或者太深色都唔得。
金毛尋回犬喺大概一歲就大定，喺約兩歲時到最大最重。雖然體形上喺兩歲成熟，性格上要到三歲以上先至完全成熟，而多主人話佢哋嘅狗一世都保持好似狗仔嘅特性。
性格
[編輯]金毛尋回犬活躍好動，鍾意玩，但係有出奇嘅耐性，可以靜靜咁坐響道幾個鐘頭唔郁，就好似打獵時等獵物咁。可能係打獵嘅遺傳，游水亦好歡喜。金毛重極之想討好主人。
同拉布拉多一樣，金毛嘅智力、對人嘅感情、對細路嘅容忍度都好出眾，鍾意𠱁人，係天生嘅守護者，所以係優秀嘅狗醫生。不過，金毛成日要人陪著先至開心。響服從測驗中表現良好，可以係優秀嘅導盲犬。雖然可能唔夠拉布拉多尋回犬響野外測試（field trial）表現咁出色，以突出嘅嗅覺見稱，亦係出色嘅獵狗。
金毛鍾意玩接嘢，接返掉出去嘅棍、網球、飛碟，可以玩上幾個鐘頭都唔厭，特別係有水玩嘅時候。
今日嘅金毛尋回犬分成兩類：出賽嘅 show dog 和獵狗。Show dog 組嘅金毛尋回犬通常骨骼較大、較長、較重。香檳色嘅長毛受推崇。而另一方面，獵狗相對較細隻，腳較長，較深色。兩類從1960年代嘅著名金毛尋回犬分出來。而家，配種嘅人試圖將兩個分支變成一種多用途嘅尋回犬。
歷史
[編輯]金毛尋回犬呢個品種喺蘇格蘭嘅 Guichan 呢個地方嚟，由 Dudley Majoribanks（後來嘅 Tweedmouth 勛爵）響 1835年配種出嚟。話說 Majoribanks 去英國海邊小鎮 Brighton 旅行，去馬戲團見倒俄羅斯牧羊狗表演，想買兩隻，馬戲團嘅訓練員唔想一竇狗分開，Majoribanks 就將成個馬戲團嘅狗都買晒返嚟配種繁殖。
雖然個故仔好浪漫，唔少人認為唔係真嘅。1952年，Majoribanks 後人將 1835年到 1890年嘅配種記錄公開，配種繁殖嘅品種之中係無俄羅斯牧羊狗份，所以個故仔係冇根據嘅。
1865年，最早將一隻叫 Nous 嘅攣毛尋回犬（wavy-coat retriever）狗公；同一隻叫 Belle 嘅特威德西班牙水獵犬（Tweed Water Spaniel）狗乸打種。特威德西班牙水獵犬而家已經絕晒種啦，但係嗰時喺邊境地區成日見倒。1868年，Nous 同 Belle 生咗一竇四隻黃色狗BB：Crocus、Primrose、Cowslip、Ada。以呢四隻狗為基礎，同愛爾蘭蹲獵犬（Red Setter）、沙色尋血獵犬（Bloodhound）、聖約翰水犬（St Johns Water Dog of Newfoundland）、士兵格獵犬（Springer Spaniel）、兩種攣毛嘅黑色尋回犬交配繁殖成一個新血統。Majoribanks 響裏面揀最理想嘅尋回犬出黎，佢嘅目標係要一種有活力、健康、易相處、乖、易訓練嘅狗。
1903年，英格蘭狗隻俱樂部首次接受金毛尋回犬註冊，叫做「平毛—金色」（Flat Coats - Golden）。1908年第一次展出，1911年被承認為一個新品種，叫「尋回犬（金色或黃色）」。1913年，金毛尋回犬俱樂部成立。1920年，正式改名做金毛尋回犬。
1881年，Hon. Archie Majoribanks 帶咗一隻金毛到加拿大，喺 1894年響美國狗隻俱樂部（AKC）註冊。係呢金毛第一次響呢兩個國家有記錄。1927年第一次響加拿大註冊，而安大略省嘅金毛尋回犬俱樂部（而家叫加拿大金毛尋回犬俱樂部）響 1958年成立。AKC 於1932年承認呢個狗種，美國金毛尋回犬俱樂 1938年部成立。
營救工作
[編輯]由於呢種狗受歡迎，對純種金毛尋回犬嘅需求亦高，成為一個不幸嘅結果，每年好多金毛俾唔再鍾意佢哋嘅主人遺棄，好多都係比較老而要睇醫生嘅。閂咗嗰啲大型嘅、臭名遠播嘅配種工場（dog farm），成為另一個無家可歸金毛狗嘅來源。
作為回應，好多志願機構進行營救嘅工作，令到被遺棄嘅金毛俾人收養。呢啲組織一方面接受啲狗，令一方面同本地嘅動物收容所協議；保證啲狗得到善待而唔會被人道毀滅，獲救嘅狗隻就會放響寄養嘅地方，直到搵到一個永久嘅屋企為止，通常會篩選領養人，以保證為啲狗提供一個合適嘅家。呢啲一類嘅組織利用互聯網籌錢、教育、揾領養嘅人、宣傳佢哋嘅信息。
參考
[編輯]- ↑ 1.0 1.1 〈10大最適合新手飼養的狗狗(二)：金毛尋回犬〉。www.bastillepost.com。喺2019-08-30搵到。
{{cite web}}: CS1 maint: url-status (link)
出面網頁
[編輯]- Information about the Golden Retriever
- 金毛尋回犬俱樂部（英文）
- 英國金毛尋回犬培育委員會（英文）
- 金毛尋回犬美國俱樂部（英文）
- GRCA 美國國家救援委員會（英文）
- 頂級金毛尋回犬網站（英文）
- 金毛尋回犬加拿大俱樂部（英文）
- 香港金毛尋回犬會
- 金毛尋回犬歷史（英文）