鈴木善幸

出自維基百科,自由嘅百科全書
跳去導覽 跳去搵嘢
鈴木善幸(1980年攝)

鈴木善幸(日文:鈴木 善幸/すずき ぜんこう Suzuki Zenkō1911年1月11號2004年7月19號),日本政治人,曾出任郵政大臣、內閣官房長官、厚生大臣、自由民主黨總務會長、農林大臣、自由民主黨總裁同內閣總理大臣

生平[編輯]

鈴木1911年1月11號響岩手縣下閉伊郡山田町出世,家族經營住鮑魚魷魚捕撈同埋水產加工業。

佢響岩手縣立水產學校畢業,之後入讀東京水產學校水產講習所(即依家嘅東京海洋大學)。大學畢業之後曾經做過大日本水產會會長伊谷以知二郎嘅秘書,又入過全國漁業組合連合會、岩手縣漁業組合連合會同中央水產業會。

1947年第一次出任眾議員,原先屬於社會革新黨,後嚟轉投自民黨。響1955年嘅保守合同之後加入宏池會,成為會長池田勇人嘅得力助手之一,從此開始進入權力中心。

鈴木善幸(1960年攝)

1960年第一次入閣,出任第1次池田內閣嘅郵政大臣,跟住就先後擔任過內閣官房長官、厚生大臣、農林水產大臣同埋自民黨總務會長。響出任總務會長期間曾經同中共領導人鄧小平見面,傾過關於釣魚台(日文:尖閣諸島)嘅問題;亦曾經多次利用自己嘅影響力起鐵路。

1980年5月社會黨提出對時任首相大平正芳嘅不信任動議,令到要響6月舉行參議院選舉,點知大平正芳響呢個時候過身。雖然在野黨出於同情就投票支持自民黨,令到自民黨赢咗,但係接班人就成為問題;最後響田中角榮嘅支持下,黨內搵嚟一向同大平老友嘅鈴木出任首相,兼且接手宏池會。

鈴木善幸響上任之後,為咗解決高達82兆億嘅國債,於是要進行唔加稅嘅財政重建,但由於當時全球經濟都唔好,政策並唔成功。響外交方面,他認為「日美同盟關係唔應該包埋軍事意義」,令到日美關係轉差,唔單止搞到時任外務大臣伊東正義直接唔撈,而且黨內都有人唔妥佢,特別係岸信介一派。加上鈴木成日畀人話係田中嘅傀儡,係「角影內閣」;雖然曾經諗過擺脫田中,但冇田中佢又乜都唔係,於是響1982年10月宣佈唔再連任。之後由中曾根康弘接任首相兼黨總裁。

響唔做首相之後出任黨最高顧問。響中曾根時代,鈴木試過努力平息角福戰爭,但係慢慢佢哋開始對於太過依靠田中嘅中曾根非常唔妥,所以鈴木響1984年9月提出「二階堂擁立構想」,希望籍住推舉田中派(即平成研究會)嘅第二號人物二階堂進出任總裁,從而取代中曾根。呢個提議雖然得到福田赳夫、河本敏夫等人支持,但由於田中唔想睇到自己嘅派系搞分裂,所以都係支持中曾根。最後黨內接訥田中嘅意見,中曾根得以繼續做首相。

1986年將宏池會會長一職交畀宮澤喜一。1990年,政界引退。2004年7月19號,響東京都因肺炎而過身,終年93歲。

屋企[編輯]

佢老婆鈴木幸,係經伊谷以知二郎介紹下識嘅,1939年響乃木神社結婚。佢哋嘅大仔鈴木俊一係政治人;三女麻生千賀子就嫁咗畀麻生太郎,而麻生都係食政治呢行飯。