長者及合資格殘疾人士公共交通票價優惠計劃

長者及合資格殘疾人士公共交通票價優惠計劃（英文：Public Transport Fare Concession Scheme for the Elderly and Eligible Persons with Disabilities），俗稱2蚊搭車同埋2蚊搭船，係香港政府勞工及福利局津貼港鐵、專營巴士公司、渡輪公司同專線小巴公司嘅大部份路線，等佢哋畀65歲或以上老人家同合資格殘疾人士，透過用長者八達通或者個人八達通畀2蚊港紙就可以搭一程車或者船。呢個計劃喺2012年6月28號開始陸續推行。

2022年2月27號，計劃擴展至60至64歲人士，不過佢哋要用新推出嘅「樂悠咭」先至可以受惠。65歲或以上人士遲下都要改用「樂悠咭」先至可以受惠。

優點同缺點

• 鼓勵受惠人士多啲出街。
• 皆因長短途路線都劃一收2蚊，有唔少合資格人士搭幾個站嘅短程都揀搭長途路線，拖慢長途路線車程。
• 皆因優惠無分時段，有唔少合資格人士都無避開返工返學嘅繁忙時間，加重公共交通負擔。
• 「合資格殘疾人士」嘅定義淨係適用於「殘疾程度達100%嘅綜合社會保障援助計劃」或「傷殘津貼」受助人，咁樣即使殘疾程度達100%，因每年居港日數唔夠60日而無法領取傷殘津貼嘅香港永久性居民，居港未滿七年無法申領傷殘津貼、同埋家庭入息超出限額而無法申領綜援嘅香港非永久性居民都無法受惠。有意見認為，計畫違反咗中華人民共和國香港特別行政區基本法第36條及殘疾人士嘅基本人權。

睇埋

• 《2蚊遊》