開台、收台

出自維基百科,自由嘅百科全書
Jump to navigation Jump to search

開台收台都係電視台廣播站成日用到嘅術語。一般嚟講,電視台或廣播站喺當日開始有節目嗰時叫開台;相反,當日節目播嗮之後兼喺發射塔撳熄嗮裝置之後先至叫收台

一般嚟講,電視台或廣播站喺收台之後到開台之前嗰橛,屬設備維護或檢修時段,大多數喺半夜到第二日朝早就嚟天光嗰時先至有。

而家由於電視同收音機質量越嚟越好,加上入咗數碼電視、廣播時代,而且好多時24個鐘都有節目睇或收聽,所以家下電視台或廣播站好少有開台同收台現象;而有啲頻道即使24個鐘都有節目睇或收聽亦都有開台現象。

開台[編輯]

開台喺好多國家嘅電視台同頻道、廣播站都有。一般嚟講,佢哋都係從測色板或鴉雀無聲嘅廣播入面開始轉入有節目嗰時嘅現象。開台之後,第一個畫面會係會彈出自己嘅電視台台徽或口號、當日播出嘅節目表、「歡迎收睇」字幕、晨曲、國歌,跟住第一個節目多數都係同早晨新聞有關,亦有時係早上啲節目騷。一般嚟講,電視台或廣播站喺後半夜搞設備維護或檢修之後即刻開台,且大多數都揀喺05:00~07:00範圍內開始當日新嘅節目。但亦有例外,有啲規模比較細嘅電視台或廣播站都會揀黃朝百晏時段開台,亦有啲超細兼冇商業化啲電視台或頻道或廣播站會揀喺晏晝到挨晚差唔多點蠟燭嗰時開始有新嘅節目。

收台[編輯]

收台喺好多國家嘅電視站同廣播站都有。一般嚟講,佢哋都係從當日節目播嗮之後開始轉入測色板彩條信號或鴉雀無聲嘅廣播現象。多數電視台喺當日最尾播出嘅節目播嗮之後,播控系統會彈出自己嘅電視台台徽或口號、國歌、結束曲、帶「再見」或「晚安」或「多謝收睇」或「全部結束」或「當日節目播映完畢」字幕啲拜拜圖無耐變成測色板或彩條信號,之後發射站會自動切斷信號,期間電視台會利用冇節目時段嚟搞設備維護或檢修。亦有啲電視台喺當日最尾播出嘅節目播嗮之後,會彈出第二日嘅節目表或國歌,再入拜拜圖,最後到測色板或彩條信號。電視台喺發射站切斷咗信號之後,喺模擬電視會長時間見到雪花,重聽到好長兼大聲嘅雜音;喺數碼電視會變成黑屏畫面,喇叭會鴉雀無聲嘅情況;若果喺網上信號或衛星信號或電視信號轉換盒,效果同數碼信號一樣,但會多樣錯誤信息出嚟。喺廣播站,當日最尾播出嘅節目播嗮之後,主播會宣佈當日節目已經播嗮嘅消息,之後廣播變成鴉雀無聲狀態。

一般嚟講,電視台喺當日最後一個節目都係啲好低收視率嘅電影劇集、娛樂資訊節目、電視騷、資訊型廣告、簡單嘅天氣預報、新聞簡報、第二日嘅節目表八樣是旦一個為主,播完之後掛埋拜拜畫面就收台;而廣播站同電視台啲手法差唔多,當日最後一個節目都係啲資訊型廣告、講故、天氣預報、新聞簡報、音樂五樣是旦一個為主。大多數嚟講,啲電視台或廣播站都揀喺23:00~02:00範圍內收台,亦有少部份電視台會提早到22:30或推遲到03:30~04:00收台都有,直到05:00~07:00時段先至有新嘅節目播出。雖然大多數電視台都有限制播出時間範圍,但大型嘅電視站多數會揀一個禮拜或一個月固定一個時間收台,亦有啲凈揀除禮拜六、日之外啲工作日去收台維護;而細型嘅電視台或廣播站會每日收台一次,亦有啲超細兼冇商業化啲電視台或頻道或廣播站會出現每日至少收台1~2次嘅機會都有。不過網上電視或部份國家級嘅大型電視台或廣播站都係24個鐘播出,好少甚至冇機會見到收台。

家下好多電視台喺收咗台之後,都唔再喺光纜或衛星入面傳輸信號,而係傳輸隻測色板或靜態相。

連出去[編輯]