反複

反複係種修辭手法，即係指重複使用某啲關鍵嘅詞語、短語或者子句。

反複可以突出思想，強調感情，分清層次，加強節奏感。

類型

連續反複

連續反複係指，將一個詞語、短語或者子句，連住擺埋一齊（中間可以隔標點符號）重複多次。連續反複嘅子句同時係疊句。連續反複用法極之簡單，只係需要將想強調嘅詞語或者子句，即刻連住重複一次。

間隔反複

間隔反複係指，將一個詞語、短語或者子句，隔住子句、句子或者段落重複多次。間隔反複可以用一個關鍵字，嚟連繫幾句分開嘅句子，可以係用嚟將某個象徵、信物、主題貫穿全文。間隔反複可能較難令讀者察覺。

例子

• 「盼望著，盼望著，東風來了，春天的腳步近了。」—— 朱自清《春》

  「盼望著，盼望著」係「盼望著」嘅連續反複，同時係疊句。

• 「春天嚟喇，春天嚟喇，萬物都充滿咗無盡嘅生命力。」

  「春天嚟喇，春天嚟喇」係「春天嚟喇」嘅連續反複，同時係疊句。

• 「沉默呵，沉默呵！不在沉默中爆發，就在沉默中滅亡。」—— 魯迅《記念劉和珍君》

  「沉默呵，沉默呵」係「沉默呵」嘅連續反複，同時係疊句。

  「沉默」分開出現四次，係「沉默」嘅間隔反複。

睇埋

• 疊句
• 複疊