關於香港沙士疫情北京救港嘅觀點

沙士喺2003年初蔓延到香港，去到同年夏天開始平息。事隔多年，有啲親中派媒體不時宣揚當年係中央政府介入幫助香港捱過疫情。不過呢個觀點就有唔少人反駁，其中有人認為，係北京隱瞞疫情在先，又任由當時已經確診嘅廣州中山大學退休教授劉劍倫來港散播病毒，先至令沙士疫情喺中國大陸以外蔓延。就算北京有安排物資送港，香港人亦唔係唔願意畀錢，而且所謂幫助香港人而引入嘅自由行政策，反而令香港人生活受到影響。

反駁或批評呢種觀點嘅說法

• 長期監察無綫電視嘅Facebook專頁大台監察2.0先後批評無綫劇集《回歸》同埋音樂節目《聲生不息》宣揚香港沙士疫情期間北京救港嘅觀點，又再次提到超級傳播者劉劍倫喺香港疫情爆發嘅角色。
• 香港中文大學人類學家麥高登（Gordon Mathews）評論自由行政策嘅時候話，中國官媒聲稱咁做旨在幫助香港復蘇經濟，但大量大陸民眾嚟香港嘅時候，亦因「搶購」、「生育旅遊」等現象而加深咗民間矛盾。
• 香港獨立政治學者黃偉國批評，中共高調宣傳支援香港，係為咗沙士係由廣東省傳入香港嘅事實。

關於中共政府隱瞞疫情導致失控嘅觀點

• 台灣中央警察大學助理教授汪子錫曾經撰文指，中共政府一開始「隱匿 SARS」、「新聞封鎖 SARS」，去到最後先承認疫情失控，結果擴大包括香港在內各地嘅枉死人數。
• 生物免疫學學者邱乾順指，欺瞞嘅中國文化，正係造成台灣、香港、加拿大、新加坡、越南等30個國家受沙士大流行波及嘅原因。邱乾順又提到，中國政府明知2002年11月，疫情已經喺廣東省爆發，但中國政府刻意封鎖疫情，2003年2月初出嚟回應疫情嘅時候仲話受控，一路都喺度隱瞞。而可憐嘅香港被中國收回後，喺呢次事件要幫中國食死貓，承擔散佈SARS嘅罪名。佢又質疑，點解當時醫療水準高出中國好多嘅台灣、加拿大、新加坡、香港等地，死亡率都超過12%，反而中國嘅死亡率只有先進國家嘅一半，除咗欺騙造假外，完全無法解釋。