跳去內容

防止未成年人沉迷網絡遊戲

改拎
出自維基百科，自由嘅百科全書

防止未成年人沉迷網絡遊戲係中華人民共和國政府針對未成年人玩得太多甚至沉迷網絡遊戲問題嘅政策。中國國家新聞出版署喺2021年8月30號下發咗《關於進一步嚴格管理 切實防止未成年人沉迷網絡遊戲的通知》，對各大網絡遊戲有關未成年人防沉迷機制提出咗更嚴格嘅要求。

目的

[編輯]

早喺2019年10月25號，中國國家新聞出版署已經下發過「關於防止未成年人沉迷網絡遊戲的通知」，規定每日夜晚10點至第二日早上8點，網絡遊戲企業唔可以用任何形式為未成年人提供遊戲服務。呢個通知仲規定，網絡遊戲企業向未成年人提供遊戲服務嘅時間長短，法定節假日每日累計唔可以超過3個鐘，其他時間每日累計唔可以超過1個半鐘[1]。

中國國家新聞出版署負責人喺2021年8月接受中國法制網嘅訪問提到：雖然2019年發布咗「關於防止未成年人沉迷網絡遊戲嘅通知」，但好多家長認為對未成年人嘅限制仍然過於寬鬆，所以今次順應民意做出咗更為嚴格嘅規範[2][3]。

內容

[編輯]

通知要求，嚴格限制向未成年人提供網絡遊戲服務嘅時間，「所有網絡遊戲企業只可喺星期五、六、日同法定節假日每日夜晚8點至9點，向未成年人提供1個鐘服務，其他時間唔可以用任何形式提供」。通知仲提到，必須嚴格落實遊戲帳號實名註冊，唔可以向未註冊用戶提供服務，各級管理部門必須落實監督審查，對於未嚴格落實嘅網絡遊戲企業，依法依規嚴肅處理。通知聲稱，要積極引導家庭、學校等社會各方面共管共治，依法履行未成年人監護責任，為未成年人健康成長營造良好環境[4]。

影響

[編輯]

通知發出之後，十幾間網絡遊戲公司喺第一時間響應通知，並且喺2021年8月31號立即實施呢個方案[5][6][7]。

中國部分網民認為呢個通知對未成年人嘅網絡遊戲服務限制過於嚴格甚至係矯枉過正，並質疑呢啲限制能唔能夠達到預期效果，亦有部分用戶擔心成年人嘅網絡遊戲服務能唔能夠得到保障[8][9]。

考慮到未成年人喺方案施行之後冇辦法每日登錄遊戲攞到每日登錄獎勵，部分遊戲公司亦針對未成年人緊急提供補償措施。例如米哈遊就將旗下嘅開放世界動作角色扮演遊戲《原神》同3D角色扮演動作遊戲《崩壞3》嘅付費制每日登錄獎勵提前發放畀未成年玩家[10][11]。騰訊公司回應話，騰訊從2017年至而家針對未成年人保護，持續進行咗各項新技術、新功能嘅自發探索同應用。跟住落嚟，基於主管部門嘅最新要求，騰訊會嚴格遵守，積極予以落實。騰訊同時表示2021年8月已經從《王者榮耀》同《和平精英》作為試點，逐步將未成年人喺非法定節假日嘅遊戲時間長度降到每日1個鐘，法定節假日降到每日2個鐘。騰訊又話，規定未滿12歲嘅玩家禁止喺騰訊嘅遊戲入面消費，同時又會打擊未成年人冒用成年人帳號同埋第三方平台買賣成年人帳號嘅行為。亦有啲體壇評論話，中國嘅電競隊伍可能會被毀滅性打擊，可能以後電子競技賽事唔會再有中國選手得獎為國爭光嘅場面[12]。

部分同網絡遊戲相關嘅公司股價亦因為相關政策走低。截至2021年8月30號，網易美股股價跌超過7%，嗶哩嗶哩美股股價跌1.8%[13]。部分網絡遊類戲股喺8月31號早盤開市走低，港股市場，騰訊跌超過3%；A股市場，完美世界、遊族網絡跌超過4%，電魂網絡、盛天網絡、吉比特、中青寶、三七互娛等紛紛下挫[14][15]。

另外，喺呢個政策實行之後，喺允許未成年人打機嘅時段，出現咗大量未成年人同時湧入而導致王者榮耀遊戲伺服器崩潰嘅情況，導致所有玩家都玩唔到遊戲，引發民怨[16][17]。亦有未成年人喺新規定推出之後為咗逃避防沉迷機制而被詐騙錢財[18]。

引用

[編輯]
  1. ↑ 中央社 (2021-08-30)。〈中國防治網癮出狠招！限制未成年人玩網路遊戲　平日禁打、假日只能玩1小時〉。《風傳媒》。原先內容歸檔喺2021-08-31。喺2021-08-30搵到。
  2. ↑ Edward (2021-08-30)。〈中國國家新聞出版署發布新規範 嚴格禁止未成年人週一至週四玩遊戲〉。《巴哈姆特》。原先內容歸檔喺2021-08-31。喺2021-08-30搵到。
  3. ↑ 國家新聞出版署 (2021-08-30)。〈國家新聞出版署有關負責人就《關於進一步嚴格管理 切實防止未成年人沉迷網絡遊戲的通知》答記者問〉。《國家新聞出版署》。原先內容歸檔喺2021-08-31。喺2021-08-30搵到。
  4. ↑ 政治中心 (2021-08-30)。〈真的出手了！中國官方：未成年網路遊戲只能「週五六日」玩1小時〉。《民視新聞網》。原先內容歸檔喺2021-09-01。喺2021-08-30搵到。
  5. ↑ 澎湃財訊 (2021-08-30)。〈米哈遊《原神》：8月31日起調整未成年人防沉迷系統〉。《澎湃新聞》。原先內容歸檔喺2021-09-01。喺2021-08-30搵到。
  6. ↑ 鷹角網絡 (2021-08-30)。〈關於鷹角網絡響應未成年人遊戲防沉迷最新規定的說明〉。《微博》。原先內容歸檔喺2021-09-01。喺2021-08-30搵到。
  7. ↑ Burningkane (2021-08-30)。〈遊戲企業積極響應未成年防沉迷新規 10多家企業已作出回應〉。《遊民星空》。原先內容歸檔喺2021-08-31。喺2021-08-30搵到。
  8. ↑ 蔡紹堅 (2021-08-30)。〈陸祭最嚴遊戲令！未成年人只能在「周五六日」玩1小時網遊〉。《ETtoday新聞雲》。原先內容歸檔喺2021-08-31。喺2021-08-30搵到。
  9. ↑ 民視新聞網 (2021-08-30)。〈快新聞／未成年網路遊戲週末只能玩1小時 中國網友崩潰喊：根本矯枉過正！〉。《雅虎新聞》。原先內容歸檔喺2021-08-31。喺2021-08-30搵到。
  10. ↑ 《原神》 (2021-08-30)。〈《原神》未成年人防沉迷系統調整及補償細則〉。《微博》。原先內容歸檔喺2021-09-01。喺2021-08-30搵到。
  11. ↑ 《崩壞3》 (2021-08-31)。〈《崩壞3》未成年人防沉迷系統調整及補償細則〉。《微博》。原先內容歸檔喺2021-09-01。喺2021-08-31搵到。
  12. ↑ 綜合外電 (2021-08-30)。〈中國鐵腕「鎮壓」電玩業！未成年只准假日每晚打1小時　網問：電競業算是涼了嗎〉。《蘋果新聞網》。原先內容歸檔喺2021-08-31。喺2021-08-30搵到。
  13. ↑ 林薏禎 (2021-08-30)。〈中國再收緊未成年人網絡遊戲監管 網易美股盤前挫逾7%〉。《鉅亨網》。原先內容歸檔喺2021-08-31。喺2021-08-30搵到。
  14. ↑ 格隆彙APP (2021-08-30)。〈遊戲新規出台 騰訊(0700.HK)跌近4%〉。《新浪網》。原先內容歸檔喺2021-09-01。喺2021-08-30搵到。
  15. ↑ 蔡敏姿 (2021-08-31)。〈未成年人1周限玩3小時 大陸遊戲類股集體重挫〉。《聯合新聞網》。原先內容歸檔喺2021-08-31。喺2021-08-31搵到。
  16. ↑ 〈陸防沉迷新規第一周 王者榮耀就崩了 還衝上熱搜第一〉。
  17. ↑ 翟思嘉編 (2021-09-05)。〈中國青少年終於等到週末 王者榮耀伺服器崩潰〉 (臺灣中文)。台北。中央通訊社。喺2021-09-05搵到。
  18. ↑ 荔枝新聞 (2021-09-05)。〈警惕！小學生為解除遊戲時長限制被騙千余元〉。《新浪財經》。喺2021-09-05搵到。
由「https://zh-yue.wikipedia.org/w/index.php?title=防止未成年人沉迷網絡遊戲&oldid=1863086」收