王者榮耀

《王者榮耀》（英文：Honor Of Kings，拼音：Wángzhě Róngyào，簡稱：王者），係中國公司騰訊旗下天美工作室群L1工作室響2015年11月開發嘅多人線上戰鬥競技場遊戲。

歷史

王者嘅前身係《英雄戰跡》、《王者聯盟》，分別響2015年7月同10月開發。天美工作室群L1工作室將前兩個遊戲改良、又加入新元素，最終響2015年11月26號發佈《王者榮耀》。

《王者榮耀》響正式發行之後響中國內地得到極大人氣，深受後生仔歡迎。去到2016年8月，《王者》一日之內嘅活躍人數高達一億，同時線上人數100萬，下載次數兩億，註冊用戶超過一億。2017年5月，成為全球手機遊戲收入榜第一名。去到2019年，王者榮耀一共賺咗78億美金（即大約511億人民幣），係中國賺得最多錢嘅遊戲。

玩法

王者峽谷

一局入面會有十位玩家，分成紅隊同藍隊，每五人一隊。地圖上會分成三條路，分別係「對抗路」、「中路」同「發育路」。

兩隊會由自己地盤開始、經地圖中心發起進攻，赢嘅條件係「破壞對方水晶」或者「令到對方投降」。要破壞對方水晶，己方就一定要破壞路上嘅「防禦塔」，而防禦塔通常會響可以到達水晶嘅3條主要路線（即「對抗路」、「中路」同「發育路」）上面，如果玩家自己入去防禦塔範圍，就會受到防禦塔嘅高傷害攻擊，攻擊亦會一次次增加；而雙方水晶都會定期向三條路線派出卒仔嚟攻擊。

玩家可以通過殺死對方嘅卒仔（俗稱「清兵」）、殺死對方玩家或者野區入面嘅怪物（俗稱「打野」，部分帶有buff）嚟提升自己嘅等級同埋賺錢，從而買更加勁嘅裝備嚟加強英雄嘅實力。

王者峽谷徵召模式

當玩家嘅段位達到永恆鑽石或者更高個陣，排位賽將會進入徵召模式。一局有十位玩家、一隊五人，之後會進入「禁用英雄階段」，藍方會優先禁用一位英雄，之後紅方兩位、藍方兩位，最後到紅方一位。排位賽最多禁用六位英雄（雙方各三位）；戰隊賽就最多只可以禁用四位英雄（雙方各兩位）。之後雙方就會進入揀邊隻英雄嘅階段，同樣藍方第一位玩家優先揀一位英雄，之後紅方第一位同埋第二位玩家各揀一隻，如此類推，直至紅方第五位玩家揀下最後一隻英雄。由於唔可以重複揀，所以雙方嘅英雄一定唔會一模一樣。

局內玩法就同王者峽谷一樣。

由於呢種玩法非常考驗玩家對於個隻英雄嘅熟練度，所以成日畀職業比賽入面作為準備階段用。

長平攻防戰

一局有六位玩家、三人一隊，玩法同王者峽谷一樣。響呢種玩法嘅地圖入面，到對方水晶嘅主要路線只有一條，有兩個野區，各有兩座防禦塔。

墨家機關道

一局兩個玩家，即單挑模式。地圖係直筒型，盡頭就係雙方玩家復活嘅地方，水晶就響復活點之前，基地前面只有一座防禦塔。當一方破壞對方防禦塔、或者令到對方舉白旗就係赢咗。

英雄

《王者榮耀》嘅英雄分為六種，有坦克、戰士、刺客、法師、射手同埋輔助。有啲英雄可能有兩種屬性，就好似張飛同時屬於輔助同埋坦克；但如果真係要細分、或者要攞皮膚嚟增益個陣，就會以第一個屬性為主，例如張飛就係「輔助」。

坦克

坦克多數係走對抗路、或者擔任「遊走」嘅角色，承受傷害嘅能力比較高、總血量亦偏高。響戰局入面，坦克多數會企響前方。

阿古朵	白起	程咬金	廉頗
劉邦	蘇烈	夏侯惇	項羽
豬八戎

戰士

曹操	達摩	典韋	宮本武藏
關羽	鎧	狂鐵	花木蘭
李信	劉備	露娜	老夫子
呂布	馬超	蒙恬	司空震
夢奇	哪吒	盤古	夏洛特
孫策	亞瑟	楊戩	雅典娜
曜	趙雲	雲纓	鍾無艷