阿爾法特種部隊
阿爾法特種部隊（粵拼：aa3 ji5 faat3 dak6 zung2 bou6 deoi2；俄文：Спецгруппа ”Альфа”）係俄羅斯聯邦安全局嘅一支特種部隊，1974年7月成立，主要負責反恐嘅工作。蘇聯解體之後，俄羅斯聯邦接管咗呢支部隊。阿爾法特種部隊參與過車臣戰爭、1993年俄羅斯憲政危機、2004年別斯蘭人質事件等等。
史
[編輯]蘇聯時期
[編輯]阿爾法特種部隊響蘇聯克格勃主席尤里·安德羅波夫嘅提議之下成立。1972年慕尼黑奧運會發生咗慕尼黑慘案，導致11個以色列運動員死亡，尤里·安德羅波夫擔心1980年莫斯科奧運會同樣會受到恐怖份子嘅襲擊，所以喺克格勃入面抽調大約30位年青成員組成阿爾法特種部隊[1]。
響1979年12月嘅風暴333行動，阿爾法特種部隊同其它蘇聯特種部隊強攻阿富汗民主共和國嘅總統哈菲佐拉·阿明嘅官邸，最終重擊斃咗阿明[2]。阿爾法特種部隊又響蘇聯境內解決咗多宗恐怖襲擊事件：1981年，阿爾法特種部隊響薩拉普爾市制服咗幾個恐怖份子，救出25個人質，無人傷亡；1983年又響格魯吉亞首都救咗全部57個人質；1988年，有32個轎車乘客俾人脅持，阿爾法特種部隊通過無線電臺同匪徒談判，最終尐匪徒放咗佢哋[3][4]。
俄羅斯聯邦時期
[編輯]1991年12月，蘇聯解體，阿爾法特種部隊俾俄羅斯聯邦接管，調咗入總統警衛局，但係之後因為兩次拒絕俄羅斯總統葉利欽嘅命令，響1993年年底調番入聯邦反間諜局。1995年，聯邦反間諜局改組成為聯邦安全局，至今阿爾法特種部隊就一直隸屬於聯邦安全局。
2002年，莫斯科歌劇院脅持事件發生，車臣獨立分子闖入莫斯科軸承廠文化宮，脅持850幾個人質，阿爾法特種部隊同脅持者對峙幾日之後，決定以祕密化學氣體麻醉表演廳所有人，再強攻劇院，結果有超過一百名人質因為吸入咗麻醉氣體而死咗[5]。
2004年，車臣獨立分子響別斯蘭劫持咗1200個人質，阿爾法特種部隊同另一個特種部隊強攻體育館，行動中至少死咗11個士兵[6]，事件最後重悲劇收場。
參考
[編輯]- ↑ 〈"阿爾法"的故事俄羅斯特種部隊揭密〉。原著喺2015年9月24號歸檔。喺2014年4月17號搵到。
- ↑ 〈對付職業恐怖分子 克格勃建立的阿爾法特種部隊〉。原著喺2013年12月14號歸檔。喺2014年4月17號搵到。
- ↑ 〈敬禮！軍號嘹亮時〉。原著喺2016年3月4號歸檔。喺2014年4月17號搵到。
- ↑ 克格勃A小組世界超一流精兵 誕生竟因奧運會?[失咗效嘅鏈]
- ↑ 人質事件讓俄國「阿爾法」特戰部隊毀譽參半
- ↑ 〈俄特種兵救學生犧牲身後仍是無名英雄〉。原著喺2015年2月24號歸檔。喺2014年4月17號搵到。