陳美光

陳美光（1933年—2020年11月8號）係星加坡甘草演員。喺馬來西亞柔佛州麻坡出世。

生平

早年生涯

陳美光喺屋企排行第四，家姐俾奶奶拎咗返中國撫養，屋企剩低五個小朋友。日軍投降之後冇耐，佢爸爸患腦膜炎離世，大哥二哥搵唔到理想嘅工作去做，12歲嘅陳美光就挑起家計，去新加坡投靠姨媽，半工半讀，日頭喺如切嘅華夏小學讀書，夜晚就去做咖啡妹陪坐。

歌唱生涯

佢細細個就鍾意唱周璇同李香蘭嘅歌曲，有次報名大世界仙樂歌台主辦嘅業餘歌唱比賽，最後喺七個人入面攞到冠軍，就咁樣被邀請上歌台演唱。又因為唱得好，佢被挖嚟挖去，一個月最多搵到1000元，比當時嘅銀行經理仲要多，冇耐就將家人都接嚟新加坡同住。

除咗流行歌曲，佢亦有演繹文藝作品，仲出咗近10張唱片。

轉戰電視界

退出歌壇後，佢喺屋企開班收徒，後來見電視台大力發展電視劇，就去試鏡，最後變成演員，14年間演過無數劇集，多數都係演比自己實際年齡大好多嘅老人家。佢外形忠奸皆宜，被媒體戲稱為無年輕過嘅演員，佢就話自己16歲嘅時後已經演60歲。佢自己最鍾意嘅角色係《五腳基》入面亦正亦邪嘅「香煙婆」。2000年，佢因為脊椎無力不良於行，要靠輪椅代步，從此退出電視圈，但仍然間唔中出席電視台嘅活動，幫手籌款。