雞地

  提示：呢篇文講嘅唔係雞林。

雞地

雞地（粵拼：gai1 dei2）係香港元朗東南面地方，1980年代之前係賣雞鴨嘅墟，所以有咁嘅名，而家呢一帶已經發展做叫新時代廣場嘅住宅屋苑同埋其他私人住宅樓。

史

20世紀初，合益公司喺建立咗元朗新墟後，先喺呢家嘅谷亭街一帶設立咗「大穀亭」，供民眾去糶（粵拼：tiu3）穀糴米（粵拼：dek9 mai2），就叫做「米地」。「米地」後來畀政府清拆咗。到咗1960年代初，村民開始聚到咗元朗墟東邊吉地繼續賣家禽。每逢墟期，村民就將啲雞鴨運到吉地大棚度賣，一籠籠雞鴨就咁擺落地下，久而久之啲人就叫開咗呢度係「雞地」。

「雞地」到呢家得返港攸路南、下攸田村外嘅雞地停車場有用，而「雞地」嘅名喺啲政府地圖或網絡地圖度都冇收，但元朗居民就一路有用返呢個名，係承載埋元朗人嘅集體回憶。

周邊環境

呢度入邊嘅新路而家有鳳攸北街，呢條路有唔少特色餐廳，獸醫診所仲有地產鋪。間中仲有市民自己擺街站，搞下分類回收、資源共享同環保教室嘅活動。其它啲街仲有鳳攸東街，鳳琴街，鳳翔路等。

公共設施

• 元朗（鳳攸北街）居民巴士總站：原喺呢度開行巴士NR920線，條線同站牌等已被取消。
• 鳳琴街體育館：政府官方地址係鳳攸北街20號。