離岸愛國主義
離岸愛國主義，係指有啲中國人離開中國之後，言行非常之愛國。
發展[編輯]
《香港01》曾經發表文章，提到2008年嘅中國經歷咗主辦北京奧運同埋汶川大地震，當時唔少海外華人自發咁樣表達對中國嘅愛國情懷。呢啲海外華人包括中國留學生、海外就業者、旅居國外的華僑、以至外籍華人[1]。
但踏入2019年起，呢啲愛國主義嘅表達方式，特別係喺他國土地之上，就顯得令人側目，例如喺中華人民共和國70周年國慶期間，有多倫多嘅海外華人喺組成豪華車隊，遍插五星紅旗，喺鬧市緩緩轟鳴而過去慶祝中國國慶，就引起咗一啲爭議[1]。
另外，香港反送中運動期間，國際社會對北京政府有唔少嘅批評，但呢啲離岸愛國主義者就同國際民主自由價值背道而馳，甚至採取暴力方式對待喺海外聲援香港嘅和平示威人士，亦引起好大嘅爭議[1]。不過，呢啲行徑反而得到中國官方媒體同埋中國使領館嘅讚賞[2]。
2022年4月，微博宣佈將會喺所有留言同埋已驗證個人帳戶上，註明用戶所在地，結果唔少標榜在外國生活嘅網絡紅人其實都身在中國大陸，相反，唔少標榜自己「愛國」嘅演員同網紅，都被標示身在中國大陸境外，離岸愛國主義再次引起討論[3]。
評價[編輯]
《香港01》曾經發表文章，指呢啲行徑可能會獲得中國內地互聯網同溫層嘅共鳴，但對於中國對外形象有損[1]。
另外，就算喺國內，亦有人揶揄，如果喺中國咁好點解要去外國，質疑呢啲人愛國到底有幾真誠[1]。
睇埋[編輯]
- 愛國係工作：用嚟批評離岸愛國主義其中一個常見嘅用語。
參考[編輯]
- ↑ 1.0 1.1 1.2 1.3 1.4 吳迪 (2019-11-04). 〈【小粉紅崛起】「離岸愛國主義」靠得住嗎？〉. 《香港01》 (香港中文). 喺2021-08-07搵到.
- ↑ 〈離岸愛國主義的強勢與滑稽〉. 《美國之音》. 喺2019-08-28搵到.
- ↑ 〈微博標記帖主IP地址後意外遭熱議的「離岸愛國」〉. 《BBC News 中文》 (繁體中文). 喺2022-05-08搵到.