風險因素

喺流行病學上，風險因素係指提升一個人患上某隻病嘅機率嘅因素：某某健康問題嘅風險因素可以係各樣嘅特徵，以至係行為，重點係呢啲因素都係同嗰種問題出現嘅機率有返咁上下相關；風險因素可以係天生就有嘅生理條件，例如遺傳背景，亦可以係後天形成嘅習慣或者環境因素呀噉。諸如公共健康同流行病學等嘅學科，周不時都會剖析疾病嘅風險因素。

要留意返嘅係，風險因素本身並唔一定同結果成因果關係，只係反映某種條件同結果之間喺統計上有咩關聯。

基本概論

睇埋：流行病學同條件概率

如果某種特徵或者條件，會令某種疾病或者不良結果發生嘅機率上升，噉呢種特徵就可以稱為一個風險因素。風險因素可以係與生俱來嘅生理條件，亦可以同個人嘅生活習慣或者行為有關。常見嘅例子包括：食煙會增加患肺癌同埋心血管病嘅風險；高血壓同中風以及冠心病有密切關聯；而長期承受心理壓力亦被視為抑鬱症嘅一個重要風險因素。

如果話某樣嘢係風險因素，意思即係話嗰樣嘢會引致一種或多種疾病或受傷，或者提升呢啲病同傷發生嘅機率。

舉數值例子說明：喺某場婚禮入面，有 74 位賓客食咗婚禮現場提供嘅雞肉，其中有 22 人，婚禮過後出現不適；相反，淨低嗰 35 位揀咗食魚類或者素食餐嘅人士之中，只得兩人事後感到不適。要判斷食咗啲雞肉係咪風險因素，可以利用相對風險（下面嘅 FH ）嚟比較兩組人出事嘅機率：

${\text{FH}}={\frac {\mbox{ 接 觸 到 風 險 因 素 嘅 人 幾 大 機 會 出 事}}{\mbox{ 冇 接 觸 到 風 險 因 素 嘅 人 幾 大 機 會 出 事}}}$

用呢條式嚟計：

食咗雞肉人士嘅風險為 22/74 ≈ 0.297；

冇食雞肉人士嘅風險為 2/35 ≈ 0.057。

由此可見，前者出現不適嘅機率超過後者五倍，即相對風險大於 5。呢個結果顯示雞肉好可能同今次事件有關。而除咗相對風險之外，風險因素仲有好多種唔同計法。

常見因素

睇埋：遺傳學同健康行為

做流行病學研究嗰陣，某個結果出現嘅機率，通常取決於多個彼此相關嘅變數之間嘅互動，所以實際做分析、評估某個或者多個因素對特定結果嘅影響嗰時，第啲冇被納入考慮嘅因素可能就會充當混淆變數，所以有可能要用到分層分析等嘅方法加以控制之。以下呢啲因素，都成日俾人攞嚟做風險因素相關嘅分析：

• 年齡
• 性別：男定女
• 族裔

除咗呢啲人口統計性質嘅因素，風險因素分析仲可以係睇：

• 地理位置：亦可以睇下空間分析講嘅嘢。
• 健康行為：好似係飲食習慣、體能活動水平、以至係有冇飲酒或者食煙等。
• 社經地位
• 遺傳傾向
• 性取向
• 職業
• 壓力水平

使用誤解

内文：相關唔蘊含因果同混淆變數

需要強調嘅係，風險因素同疾病或負面結果之間，只係呈現統計相關，但相關關係本身並唔一定表示兩者間成因果關係，所以喺嚴格嘅流行病學研究入便，單憑用風險因素計嘅呢類統計比較，仍然唔足以構成確證，仲要有埋其他證據同進一步調查，先可以判定真正嘅成因。

睇埋

• 共病
• 公共健康
• 環境因素
• 預防醫學

資源

• （中文）身體狀況風險因素，呢道講到中風有邊啲風險因素。