香板
香板係漢傳佛教嘅用具，由禪宗時代開始。佢嘅外形係一把扁長型嘅木板，個樣似寶劍，上面刻咗「警策」、「精進」嘅字樣。香板係佛寺中成日用嘅警策法器，係一種維護寺廟清規、懲罰僧人唔守紀律嘅工具，亦都有警策行道、監督勉勵精進嘅用意。香板主要用嚟對治僧眾參禪打坐嘅時候，出現昏沉、瞓著、坐嘅姿勢唔好等等嘅現象，督促僧眾精進用功而設立嘅。喺叢林法器之中，香板有佢特別嘅來歷同用法[1]。
為咗警策用功辦道而用嘅，叫做警策香板。為咗儆懲違犯清規而用嘅，叫做清規香板。為咗警醒禪坐昏散而用嘅，叫做巡香香板。「打禪七」[2]而用嘅，叫做監香香板。
至於有資格用香板嘅，就係四大班頭，首座、西堂、後堂同堂主，同埋方丈、維那、知客、糾察等等有職銜嘅僧侶。因為用嘅目的唔同，而有唔同嘅名，又因為職責嘅差別，形式長短都有區別。方丈用嘅香板，尺寸大啲、而且喺板面上面刻咗三條線痕，意思係參透三關。
傳統叢林中使用嘅香板打禪僧，同禪宗史上嘅「德山棒」一樣，係為咗幫啲參禪者消除業障，啟發智慧，促使開悟，功用非常之大，同時又有助道場中嚴謹修道風氣嘅形成。而家叢林寺院講求人性化嘅管理，已經好少用香板做懲戒工具。但係香板仍然有佢代表住叢林嘅威嚴。